कुटुंबियांच्या हवाल्याने आमदार आर्लेकरांनी दिली पत्रकारांना माहिती
पेडणे : धारगळ येथील सुकेकुळण भागात सोमवारी सकाळी ७.५० वाजता एका १७ वर्षीय युवकावर झालेल्या ॲसिड हल्ल्याने खळबळ मजली आहे. या हल्ल्यात ऋषभ शेट्ये (वय १७) हा युवक गंभीर जखमी झाला असून त्याच्यावर बांबोळी येथील गोमेकॉ रुग्णालयात उपचार सुरू आहेत.
नेमके काय प्रकरण ?
ऋषभ शेट्ये हा युवक म्हापशातील उच्च माध्यमिक विद्यालयात शिक्षण घेत आहे. नेहमीप्रमाणे त्याला वडिलांनी बस स्टॉपवर सोडले व ते निघून गेले. ऋषभ बसची वाट पाहत उभा होता. सकाळी ७.३० च्या दरम्यान एका दुचाकीवरून आलेल्या दोघा अज्ञात इसमांपैकी एकाने त्याच्यावर थेट अॅसिड फेकले आणि घटनास्थळावरून पळ काढला. अॅसिड अंगावर पडल्यानंतर अंग होरपळू लागल्याने तो जीव वाचवण्यासाठी धावला. दरम्यान त्याने रस्त्यावरून जाणाऱ्या वाहनांना थांबवून मदतीसाठी याचना केली, पण कुणी थांबले नाही. काहीवेळाने त्याचे वडील आले आणि त्यांनीच ऋषभला म्हापसातील जिल्हा रुग्णालयात दाखल केले. प्राथमिक उपचार दिल्यानंतर जखमी अवस्थेत ऋषभला तातडीने गोमेकॉत हलवण्यात आले. ऋषभ हा पोलीस कर्मचाऱ्याचा मुलगा आहे.
दरम्यान याप्रकरणी ऋषभच्या वडिलांची प्रतिक्रिया हाती आली आहे.
याप्रकरणी स्थानिक आमदार प्रवीण आर्लेकर यांची प्रतिक्रिया देखील समोर आली आहे. आर्लेकरांनी ऋषभच्या कुटुंबियांची भेट घेतली व या हल्ल्यामागे नेमके काय कारण असू शकेल याचा शोध घेण्याचा प्रयत्न केला. यावेळी हा हल्ला कुणी केला व का केला याबाबत आपण अनभिज्ञ असल्याचे त्यांनी सांगितले. मात्र कुटुंबियांपैकी एकाने ही घटना प्रेम प्रकरणामुळेच घडली असावी अशी शक्यता व्यक्त केल्याचे आर्लेकरांनी पत्रकारांशी बोलताना म्हटले. त्याच अनुषंगाने त्यांनी पोलिसांना तपास करण्याबाबत सूचना दिल्या आहेत. आर्लेकरांनी दिलेल्या माहितीनुसार ऋषभच्या उजव्या डोळ्याला गंभीर इजा पोहोचली असून शरीर ३० टक्क्यांपर्यंत भाजले आहे. दरम्यान ऋषभ सध्या उपचारांना प्रतिसाद देत असल्याचीही माहिती समोर आली असून त्याच्या प्रकृतीवर डॉक्टरांचे पथक लक्ष ठेवून आहेत.
आर्लेकर नेमके काय म्हणाले ? पहा व्हिडिओ..
हल्ल्यानंतर परिसरात एकच खळबळ उडाली. स्थानिकांनी तत्काळ पोलिसांना माहिती दिली. काही वेळातच पेडणे पोलीस स्थानकाचे पथक घटनास्थळी दाखल झाले. या हल्ल्याचे नेमके कारण काय, हे अद्याप स्पष्ट झालेले नाही. हल्लेखोर कोण होता, त्याची ओळख पटलेली नाही. पेडणे पोलीस घटनास्थळावरील सीसीटीव्ही फुटेज तपासत आहेत. काही वेळाने ठसेतज्ज्ञ घटनास्थळी दाखल झाले व त्यांनी हल्लेखोरांनी वापरलेल्या बकेट आणि आतमधील रसायनाचे नमुने घेतले. उत्तर गोवा पोलीस अधीक्षक राहुल गुप्ता यांनीही या ठिकाणी दाखल होऊन पाहणी केली असून दोषींवर लवकरात लवकर कारवाई केली जाईल, असे म्हटले आहे.
