🔥 ब्रेकिंग न्यूज

•

क्वालालंपूर : भारतीय बॅडमिंटनपटू किदाम्बी श्रीकांतने शनिवारी मलेशिया मास्टर्स सुपर ५०० बॅडमिंटन स्पर्धेत सनसनाटी कामगिरी करत पुरुष एकेरीच्या अंतिम फेरीत धडक मारली. जपानच्या युशी तनाकाला सरळ गेममध्ये पराभूत करून श्रीकांतने तब्बल सहा वर्षांनंतर बीडब्ल्यूएफ स्पर्धेच्या अंतिम फेरीत स्थान मिळवले.

२०२३ च्या जागतिक अजिंक्यपद स्पर्धेत रौप्यपदक विजेत्या श्रीकांतने आपल्या अनुभवाचा आणि कौशल्याचा अप्रतिम वापर करत तनाकाला २१-१८, २४-२२ असे पराभूत केले. जागतिक क्रमवारीत २३ व्या स्थानावर असलेल्या तनाकाविरुद्ध श्रीकांतने अचूक नेट प्ले आणि आक्रमक खेळाचे प्रदर्शन केले.

🏅

अंतिम फेरीपर्यंत पोहोचण्यासाठी श्रीकांतने अनेक कडव्या लढती दिल्या. उपांत्यपूर्व फेरीत त्याने फ्रान्सच्या उच्च मानांकित टोमा ज्युनियर पोपोव्हला कडवी झुंज देत २४-२२, १७-२१, २२-२० असे पराभूत केले. एक तास १४ मिनिटे चाललेल्या या सामन्यात श्रीकांतने जागतिक क्रमवारीत १८ व्या स्थानावर असलेल्या पोपोव्हला आश्चर्यचकित केले. यापूर्वी, प्री-क्वार्टर फायनलमध्ये त्याने जागतिक क्रमवारीत ३३ व्या स्थानावर असलेल्या गुयेनविरुद्ध ५९ मिनिटांत २३-२१, २१-१७ असा विजय मिळवला होता.

माजी जागतिक नंबर वन असलेला श्रीकांत गेल्या काही हंगामांपासून खराब फॉर्म आणि तंदुरुस्तीच्या समस्यांनी ग्रासलेला होता, ज्यामुळे तो सध्या जागतिक क्रमवारीत ६५ व्या स्थानावर घसरला आहे. मात्र, मलेशिया मास्टर्समधील त्याची कामगिरी ही त्याच्या पुनरागमनाची नांदी ठरली आहे.

२०१७ मध्ये चार बीडब्ल्यूएफ जेतेपदे जिंकणारा श्रीकांत हा पहिला भारतीय खेळाडू ठरला होता. त्यानंतर त्याने सांघिक स्पर्धेत भारताला पहिले राष्ट्रकुल क्रीडा स्पर्धेत सुवर्णपदक मिळवून दिले होते. मात्र, त्यानंतर लवकरच त्याचा संघर्ष सुरू झाला. आता तो पुन्हा एकदा फॉर्ममध्ये परतल्याचे दिसत आहे.

श्रीकांतच्या या विजयामुळे भारतीय बॅडमिंटन चाहत्यांमध्ये उत्साहाचे वातावरण आहे. २०१९ च्या इंडिया ओपनमध्ये उपविजेता ठरल्यापासूनचा हा पहिलाच बीडब्ल्यूएफ वर्ल्ड टूरमधील अंतिम सामना आहे.