आठवड्याभरात तिसरी घटना
पणजी : टोंक येथील एका रेस्टॉरंटजवळ पुन्हा गांजाचे रोपटे आढळल्याने खळबळ माजली आहे. गेल्या ८ दिवसांतील ही तिसरी घटना आहे. दरम्यान याबाबत माहिती मिळताच एएनसीच्या पथकाने घटनास्थळी दाखल होत रोपटे जप्त केले व मातीचे नमुने घेतले.
६ जानेवारी रोजी सकाळी शीतल हॉटेल ते मधुबन जंक्शन रस्त्यानजीक असलेल्या झरीना टॉवर या इमारतीसमोर गांजाचे एक रोपटे उगवल्याचे समोर आले. नीट निरखून पाहिल्यास हे रोपटे विशेष काळजी घेऊन वाढवल्यासारखे दिसत होते. तरीही हे रोपटे नेमके येथे कसे आले हा प्रश्न आहेच.
४ जानेवारीला काकुलो मॉलजवळ देखील एक रोपटे आढळून आल्यानंतर एएनसीने ते ताब्यात घेतले होते. फुटभर लांबीचे प्रथमदृष्ट्या गांजासदृश दिसणारे हे रोपटे पाहून लोकांनी अंमली पदार्थ विरोधी पथकाशी संपर्क साधला. एएनसी अधिकारी घटनास्थळी पोहोचले आणि त्यांनी ते रोपटे तपासासाठी पाठवले. तपासणीसाठी अधिकाऱ्यांनी येथील मातीचे नमुने गोळा केले होते. मात्र अद्याप यावर कोणताही अहवाल जारी करण्यात आलेला नाही.
