अंतिम सामन्यात तीन वेळा विजेत्या पाटणा पायरेट्सचा ३२-२३ने पराभव
पुणे : प्रो कबड्डी लीग सीझन ११ मध्ये नवीन चॅम्पियन मिळाला आहे. हरियाणा स्टीलर्सने पाटणा पायरेट्सचा पराभव करून अंतिम फेरीत विजेतेपद पटकावले आणि प्रथमच या ट्रॉफीवर कब्जा केला. हरियाणाने पाटणाचा ९ गुणांनी पराभव करत हे विजेतेपद पटकावले. या हंगामात हरियाणाने चमकदार कामगिरी केली, त्याचा परिणाम अंतिम सामन्यातही दिसून आला.
प्रथमच विजेत्या हरियाणा स्टीलर्सने पूर्ण वेळेत ३२ गुण मिळवले. तर पाटणा पायरेट्स संघाला केवळ २३ गुण मिळवता आले. यासह पाटणा पायरेट्सचे चौथ्यांदा चॅम्पियन होण्याचे स्वप्न भंगले. या विजयानंतर हरियाणा स्टीलर्सचे खेळाडू खूप भावूक झाले आणि त्यांनी जबरदस्त आनंद साजरा केला. प्रशिक्षक म्हणून मनप्रीत सिंग पहिल्यांदाच चॅम्पियन बनले आहेत. याआधी ते प्रशिक्षक म्हणून तीन फायनल हरले होते.
हरियाणा स्टीलर्सने अंतिम सामन्यात चमकदार कामगिरी करत पाटणा संघाला दडपणाखाली ठेवले. त्यामुळे पाटणा संघाने अधिक चुका केल्या. हरियाणासाठी शिवम पात्रेने सर्वाधिक ९ गुण मिळवले. त्याशिवाय शादलूने हाय-५च्या मदतीने ७ गुण मिळवले. विनयने ६ तर राहुल सेठपालने ३ गुण मिळवले. देवांक आणि अयानची जोडी आज पटनासाठी चालली नाही. देवांक अंतिम सामन्यात केवळ ५ गुणांची कमाई करू शकला. अयानही ३ गुण मिळवण्यात यशस्वी ठरला. तर गुरदीपने हाय-५ च्या मदतीने ६ गुण मिळवले.
शेवटच्या १० मिनिटांत सामना फिरवला
हरियाणा स्टीलर्स आणि पाटणा पायरेट्स यांच्यात चुरशीची स्पर्धा झाली. पाटणा पायरेट्सला ऑलआऊट करत हरियाणाने अंतिम १० मध्ये आघाडी घेतली. त्यानंतर ते पुन्हा आघाडीवर होते. पूर्वार्धापासून ते आघाडीवर असले, तरी ऑल आऊट झाल्यानंतर आता पाटणा त्यांची पाठ सोडू शकणार नाही, हे निश्चित होते. सामन्याला ५ मिनिटांपेक्षा कमी वेळ बाकी असताना हरियाणाची आघाडी ८ गुणांनी वाढली. यानंतर हरियाणाने खेळाचा वेग कमी करत अंतिम विजेतेपद पटकावले.
