खानापूर-बेळगाव येथे रोड शोमध्ये सहभागी झालेले मुख्यमंत्री डॉ. प्रमोद सावंत व उमेदवार जगदीश शेट्टर.
पणजी : कर्नाटकसाठी म्हादई हा कदाचित निवडणुकीचा मुद्दा असू शकतो. मात्र गोव्यासाठी म्हादई ही जीवनदायिनी आहे, असे मत मुख्यमंत्री डॉ. प्रमोद सावंत यांनी व्यक्त केले. बुधवारी बेळगाव येथे भाजपचे उमेदवार जगदीश शेट्टर यांनी उमेदवारी अर्ज दाखल केला. यावेळी मुख्यमंत्री डॉ. सावंत, कर्नाटकचे माजी मुख्यमंत्री बी. एस. येडीयुरप्पा उपस्थित होते. यानंतर डॉ. सावंत यांनी रोड शो मध्ये सहभाग घेतला.
यावेळी मुख्यमंत्री पुढे म्हणाले की, गोव्याला पिण्याचे पाणी मिळण्यासाठी, गोव्यातील पर्यावरण जपण्यासाठी, तसेच शेतीसाठी म्हादईचा प्रवाह वाहता राहणे आवश्यक आहे. म्हादई प्रश्न सध्या सर्वोच्च न्यायालय, ‘प्रवाह’कडे आहे. याशिवाय आम्ही केंद्र सरकारशीही बोलणी करत आहोत. म्हादई आमच्यासाठी जिव्हाळ्याचा विषय आहे. आम्ही म्हादईवरील आमचा हक्क कधीच कमी होऊ देणार नाही.न्यायालयाच्या आदेशानुसार गोव्यात कन्नडिगांची घरे रिकामी केली जात आहेत. मात्र अशा निर्वासितांसाठी स्वतंत्र जागा उपलब्ध करून देण्यासाठी आणि त्यांचे पुनर्वसन करण्यासाठी पावले उचलण्यात आली आहेत, असे गोव्याचे मुख्यमंत्री डॉ. प्रमोद सावंत यांनी सांगितले. बुधवारी उमेदवारी अर्ज सादर करताना त्यांच्यासोबत असलेले बेळगाव लोकसभा मतदारसंघातील भाजपचे उमेदवार जगदीश शेट्टर पत्रकारांशी बोलताना म्हणाले, न्यायालयाच्या आदेशाचे पालन करणे हे सरकारचे कर्तव्य आहे. निर्वासित कन्नडिगांबाबत मुख्यमंत्री सिद्धरामय्या माझ्याशी थेट बोललेले नाहीत.
