घरगुती गॅससाठी ओटीपी अनिवार्य ; पैसे भरण्यासाठी शुल्क
नवी दिल्ली : देशात १ नोव्हेंबरपासून सिलिंडर बुकिंग आणि बँकिंग व्यवहारासंदर्भात काही महत्त्वाच्या नियमांमध्ये बदल होणार आहे. तर दुसरीकडे रेल्वेद्वारेही वेळापत्रकात काही बदल करण्यात येणार आहेत. या नियमांचा थेट परिणाम सामान्यांवर होणार आहे.
१ नोव्हेंबरपासून एलपीजी सिलिंडर तुमच्यापर्यंत पोहोचण्याची प्रक्रिया बदलणार आहे. सिलिंडर बुक केल्यानंतर ग्राहकांच्या मोबाईल क्रमांकावर एक ओटीपी पाठवण्यात येणार आहे. जेव्हा सिलिंडर घरी येईल तेव्हा सिलिंडर पोहोचवणाऱ्यांना तो ओटीपी द्यावा लागेल. सिस्टममध्ये त्या ओटीपीची पडताळणी केल्यानंतर ग्राहकांना सिलिंडर देण्यात येईल. नव्या प्रक्रियेमुळे ग्राहकांना जसा फायदा होणार तसाच त्यांना समस्यांचा सामनाही करावा लागणार आहे. जर ग्राहकांचा पत्ता आणि मोबाईल क्रमांक चुकीचा असला तर त्यांना सिलिंडर मिळणार नाही. त्यामुळे नाव, पत्ता आणि मोबाईल क्रमांक अपडेट करण्याचे आवाहन कंपन्यांकडून करण्यात आले आहे. व्यावसायिक एलपीजी सिलिंडरसाठी हा नियम लागू असणार नाही.
इंडेन गॅसने बदलला बुकिंग क्रमांक
जर तुम्ही इंडेन गॅस कंपनीचे ग्राहक असाल तर तुम्हाला जुन्या क्रमांकावर गॅस बुक करता येणार नाही. कंपनीने गॅसच्या बुकिंगसाठी आपल्या ग्राहकांना एक नवा क्रमांक जारी केला आहे. इंडेनच्या ग्राहकांसाठी आता देशभरात ७७१८९५५५५५ हा एकच क्रमांक असणार आहे.
