पेडणे : पोकेवाडा-मोरजी येथील सरकारी प्राथमिक शाळेच्या इमारतीच्या छपराच्या दुरुस्तीचे काम आठ दिवसांच्या आत प्राधान्याने हाती घेण्याचे निर्देश गोवा राज्य बाल हक्क संरक्षण आयोगाने (Goa State Commission for Protection of Child Rights (GSCPCR)) सार्वजनिक बांधकाम खात्याला दिले आहेत. या इमारतीत अंगणवाडी केंद्र क्रमांक ६१ कार्यरत असून, तेथे ११ मुले शिक्षण घेत आहेत.
आयोगासमोर झालेल्या सुनावणीदरम्यान सार्वजनिक बांधकाम खात्याने आठ दिवसांच्या आत छपराचे काम हाती घेण्याचे आश्वासन दिले. या सुनावणीला महिला व बालकल्याण संचालनालय, शिक्षण संचालनालय यांचे प्रतिनिधी तसेच पेडणेचे उपजिल्हाधिकारी उपस्थित होते. मुलांच्या सुरक्षिततेच्या दृष्टीने दुरुस्तीच्या कामाला प्राधान्य देण्यावर आयोगाने भर दिला.
यापूर्वी, २४ ऑक्टोबर रोजी आयोगाचे अध्यक्ष शशिकांत पुनाजी यांनी या शाळेला भेट देऊन इमारतीच्या प्रलंबित दुरुस्तीचा आणि अंगणवाडी केंद्रासाठी करण्यात आलेल्या व्यवस्थेचा आढावा घेतला होता.
या पाहणीदरम्यान इमारतीच्या आवश्यक दुरुस्तीला होत असलेला विलंब आणि अंगणवाडीतील मुलांसाठी उपलब्ध असलेल्या सध्याच्या व्यवस्थेची योग्यताही आयोगाच्या निदर्शनास आली. मुलांना शिक्षण व पूर्वप्राथमिक बालसंगोपनासाठी सुरक्षित आणि योग्य वातावरण मिळावे, यासाठी संबंधित यंत्रणांनी वेळेत आवश्यक कार्यवाही करावी, असे आयोगाने स्पष्ट केले.
दुरुस्तीचे काम वेळेत पूर्ण व्हावे आणि मुलांचे हित, सुरक्षितता व कल्याण यांना सर्वोच्च प्राधान्य मिळावे, यासाठी आयोग या प्रकरणाचा सातत्याने पाठपुरावा करणार आहे.