वास्को : अखिल भारतीय विद्यार्थी परिषदेचे (अभाविप) कार्यकर्ते, काँग्रेस पक्षाचे उपनेते, आमदार ते नंतर भाजपमध्ये प्रवेश केल्यानंतर आज मंत्रीपदी विराजमान होणारे मुरगावचे आमदार संकल्प आमोणकर यांचा राजकीय प्रवास थक्क करणारा आहे. (Sankalp Amonkar is an Indian politician and businessman who serves as a member of the Goa Legislative Assembly, representing the Mormugao Assembly constituency.) संघर्षातून राजकारणात ठसा उमटवणारे नेतृत्त्व म्हणून त्यांच्याकडे पाहिले जात आहे. गोव्याच्या राजकारणात त्यांनी आपल्या राजकीय प्रवासातून वेगळी ओळख निर्माण केली आहे. राजकारणासोबतच व्यावसायिक क्षेत्रातही कार्यरत आहेत.
काँग्रेसमधून राजकीय कारकिर्दीला सुरूवात केलेल्या आमोणकर यांनी २०२२ च्या विधानसभा निवडणुकीत भाजपचे तीन वेळा आमदार राहिलेले मिलिंद नाईक यांचा पराभव करून सर्वांचे लक्ष वेधून घेतले होते. त्यांनी १,९४१ मतांच्या फरकाने विजय मिळवला होता. त्यानंतर सप्टेंबर, २०२२ मध्ये काँग्रेस पक्षाच्या इतर सात आमदारांसोबत त्यांनी भाजपमध्ये प्रवेश केला. त्यात आमदार दिगंबर कामत तसेच आमदार मायकल लोबो यांचाही समावेश होता.
३० जून १९७५ रोजी दक्षिण गोव्यात संकल्प यांचा जन्म झाला. झुआरीनगर येथील मुरगाव एज्युकेशन सोसायटीमधून त्यांनी १९९७ मध्ये कला शाखेची पदवी प्राप्त केली. त्यांचा विवाह व्यावसायिक श्रद्धा आमोणकर यांच्याशी झाला. त्याही राजकारणात सक्रीय आहेत. सध्या वास्को येथे वास्तव्यास आहेत.
आमोणकर यांनी काँग्रेस पक्षात विविध महत्त्वाच्या जबाबदाऱ्या सांभाळल्या आहेत. ते काँग्रेस विधिमंडळ पक्षाचे माजी उपनेते, गोवा प्रदेश काँग्रेस समितीचे माजी उपाध्यक्ष आणि प्रदेश युवक काँग्रेसचे अध्यक्ष राहिले आहेत. तसेच नॅशनल युनियन ऑफ सीफेरर्स ऑफ इंडियाचे राज्य अध्यक्ष म्हणूनही त्यांनी काम पाहिले आहे.
काँग्रेसच्या माध्यमातून राजकीय वाटचाल सुरू करणाऱ्या आमोणकर यांनी २०२२ मध्ये भाजपमध्ये प्रवेश केला. त्यामुळे त्यांच्या राजकीय प्रवासाला नवे वळण मिळाले. काँग्रेसमधील संघटनात्मक जबाबदाऱ्यांपासून ते विधानसभा निवडणुकीतील विजय आणि त्यानंतर भाजपमधील प्रवेशापर्यंतचा त्यांचा प्रवास आणि संघर्ष याची गोव्याच्या राजकीय घडामोडींमध्ये चर्चा होत आहे.
