पणजी : प्रादेशीक संपर्क व्यवस्था सुधारणे, औद्योगिक व व्यावसायिक हालचालींना चालना देणे तसेच राज्यातील पर्यटनाला प्रोत्साहन देण्यासाठी कुठ्ठाळी ते मडकई दरम्यान 'रो-रो' फेरी सेवा सुरू करावी, अशी मागणी गोवा चेंबर ऑफ कॉमर्स अँड इंडस्ट्री'ने (जीसीसीआय) ( Goa Chamber of Commerce And Industry (GCCI)) राज्य सरकारकडे केली आहे.
याबाबत चेंबरच्या शिष्टमंडळाने नुकतीच मंत्री सुभाष फळदेसाई यांची भेट देऊन त्यांना याबाबत निवेदन दिले. फळदेसाई यांनी याबाबत खात्यातर्फे विचार केला जाईल असे आश्वासन दिले. चेंबरच्या शिष्टमंडळात चंद्रकांत गावस, किरण बाळळीकर आणि संकेत कासकर यांचा समावेश होता.
अशी फेरी विशेषतः मडकई आणि आसपासच्या परिसरातील औद्योगिक व व्यावसायिक घडामोडींसाठी अत्यंत आवश्यक असल्याचे चेंबरने नमूद केले. प्रस्तावित सेवा स्थानिक रहिवासी, दररोज प्रवास करणारे प्रवासी, कर्मचारी, उद्योजक, व्यावसायिक वाहन चालक आणि मडकई औद्योगिक क्षेत्रात येणाऱ्या लोकांसाठी वाहतुकीचा एक पर्यायी मार्ग उपलब्ध करून देईल.
ही प्रस्तावित फेरी सेवा रस्ते वाहतुकीवरील अवलंबित्व कमी करण्यास, वाहतूक कोंडी कमी करण्यास, प्रवासाचा वेळ वाचवण्यास आणि प्रवासासाठी सोयीस्कर व किफायतशीर साधन उपलब्ध करून देऊ शकेल. जलमार्गाद्वारे वाहने नेण्याची सुविधा उपलब्ध झाल्यामुळे वैयक्तिक प्रवाशांसह व्यावसायिक आणि औद्योगिक वापरकर्त्यांनाही मोठा फायदा होईल.
अशी फेरी उपलब्ध झाल्यास पर्यटकांना मडकई आणि आसपासच्या परिसराला भेट देण्यास प्रोत्साहन मिळेल, तसेच स्थानिक व्यवसाय आणि पर्यटनाशी संबंधित उपक्रमांसाठी नवीन संधी निर्माण होतील.
हा उपक्रम गोव्यामध्ये कार्यक्षम आणि शाश्वत जल-वाहतुकीला प्रोत्साहन देण्याच्या व्यापक उद्दिष्टालाही पूरक ठरेल. चेंबरने गोव्यातील नागरिक व व्यवसायांच्या हितासाठी हा उपक्रम लवकरात लवकर पुढे नेला जाईल, अशी आशा व्यक्त केली. प्रस्तावित सेवेच्या अंमलबजावणीसाठी आवश्यक असेल तेव्हा पूर्ण सहकार्य आणि पाठिंबा देण्याचे आश्वासन चेंबरने दिले आहे.