गोव्याला जागतिक गुंतवणूक केंद्र बनवणार : मुख्यमंत्री डॉ. सावंत

पणजी : गोव्यात दर्जेदार पायाभूत सुविधा, विमानतळे, बंदरे आणि रस्ते उद्योगांसाठी उपयुक्त ठरत असून, राज्य सरकारने उद्योगस्नेही धोरणे तयार केली आहेत. ‘व्हायब्रंट गोवा’च्या माध्यमातून गोव्याला व्यवसाय, नवोपक्रम आणि गुंतवणुकीसाठी जागतिक स्तरावरील महत्त्वाचे केंद्र म्हणून विकसित करण्याचे ध्येय आहे. गुंतवणूकदारांनी या संधीचा लाभ घेत गोव्यात मोठी गुंतवणूक करावी, असे आवाहन मुख्यमंत्री डॉ. प्रमोद सावंत यांनी केले.

ताळगाव येथील डॉ. श्यामाप्रसाद मुखर्जी इनडोअर स्टेडियममध्ये गुरुवारी ‘व्हायब्रंट गोवा ग्लोबल बिझनेस समिट २०२६’चे थाटात उद्घाटन झाले. त्यावेळी मुख्यमंत्री बोलत होते. २९ ते ३१ ऑक्टोबरदरम्यान चालणाऱ्या या परिषदेत उद्योगजगतातील प्रमुख व्यक्ती, आंतरराष्ट्रीय प्रतिनिधी आणि धोरणकर्ते सहभागी झाले आहेत. उद्घाटनावेळी खासदार सदानंद शेट तानावडे, माजी केंद्रीय मंत्री सुरेश प्रभू, राजकुमार कामत, हिरो एंटरप्रायझेसचे सुनील कांत मुंजाल आणि इतर मान्यवर उपस्थित होते.

यंदाच्या व्हायब्रंट गोवा परिषदेत जगभरातील ५० देशांतील ५०० हून अधिक प्रतिनिधी सहभागी झाले आहेत, ही गोव्यासाठी अभिमानास्पद बाब असल्याचे मुख्यमंत्र्यांनी सांगितले. २०१९ पासून सुरू झालेल्या या उपक्रमाने व्यावसायिक भागीदारी आणि आंतरराष्ट्रीय सहकार्याला मोठी चालना दिली आहे. गोव्यातील उद्योगक्षेत्रात गुंतवणूक, तांत्रिक प्रगती आणि नावीन्य आणण्यासाठी ही मोठी संधी आहे. तरुण उद्योजकांनी आपला व्यवसाय जागतिक पातळीवर नेण्यासाठी या परिषदेचा लाभ घ्यावा, असे आवाहन डॉ. प्रमोद सावंत यांनी केले.