भोपाळ : झाशीतील सीपरी बाजार पोलीस ठाण्याच्या हद्दीतील एका हॉटेलमध्ये घडलेल्या एका घटनेने संपूर्ण परिसर हादरून गेला आहे. पती आणि हॉटेलच्या कर्मचाऱ्यासोबत खोलीत प्रवेश करत असताना २८ वर्षीय नववधू मुस्कान सिमोलिया अचानक खोलीच्या दारात मागच्या बाजूला कोसळली. जमिनीवर कोसळताच तिच्या डोक्याला जोरदार दणका बसला. पतीने तिला लगेच उचलून खोलीत नेले, परंतु दुसऱ्या दिवशी सकाळी तिला रुग्णालयात दाखल केले असता डॉक्टरांनी तिला मृत घोषित केले. अवघ्या ५ सेकंदांत घडलेली ही संपूर्ण घटना हॉटेलच्या सीसीटीव्ही कॅमेऱ्यात कैद झाली असून, या फुटेजमुळे या रहस्यमयी मृत्यूबाबत अनेक गंभीर प्रश्न निर्माण झाले आहेत. मुस्कानच्या वडिलांनी तिच्या पतीवर हत्येचा आरोप केला असून पोलिसांनी तपास सुरू केला आहे.
मिळालेल्या माहितीनुसार, मध्य प्रदेशातील विदिशा येथील रहिवासी आणि बँक मॅनेजर असलेल्या निलेशसोबत मुस्कानचा २९ जून रोजी विवाह झाला होता. शुक्रवारी रात्री हे दांपत्य झाशीच्या सीपरी बाजार परिसरातील एका हॉटेलमध्ये उतरले होते. शनिवारी सकाळी मुस्कानची प्रकृती बिघडल्याने तिला तातडीने जिल्हा रुग्णालयात नेण्यात आले, मात्र तोपर्यंत उशीर झाला होता. पोलीस अधीक्षक प्रीती सिंग यांनी दिलेल्या माहितीनुसार, पोलीस पथकाने तातडीने हॉटेलची पाहणी केली आणि सीसीटीव्ही फुटेज ताब्यात घेतले. या फुटेजमध्ये मुस्कान खोलीबाहेर अचानक कोसळताना स्पष्ट दिसत आहे. पती निलेशच्या सांगण्यानुसार, दोघे हॉटेलमधून चेक-आउट करण्याची तयारी करत असताना मुस्कान अचानक चक्कर येऊन पडली आणि हॉटेल कर्मचाऱ्यांच्या मदतीने तिला रुग्णालयात नेण्यात आले.
मात्र, मुस्कान अचानक कशी कोसळली आणि तिच्या मृत्यूचे मूळ कारण काय, हे अद्याप अस्पष्ट आहे. सीसीटीव्ही फुटेजमध्ये ती पडताना दिसत असली तरी तिची प्रकृती अचानक का बिघडली किंवा तिच्यावर काही हल्ला झाला होता का, हे केवळ फुटेजवरून स्पष्ट होत नाही. दरम्यान, मुस्कानचे वडील रामजी लाल अहिरवार यांनी या घटनेवर तीव्र संशय व्यक्त केला आहे. मुस्कानच्या डोक्याला गंभीर दुखापत झाल्याचे त्यांनी निदर्शनास आणून दिले असून पतीने तिची हत्या केल्याचा थेट आरोप केला आहे. त्यांनी या प्रकरणाची सखोल आणि निष्पक्ष चौकशी करण्याची मागणी पोलिसांकडे केली आहे.
मुस्कानच्या वडिलांनी लावलेल्या आरोपांनुसार, निलेशचे हे पहिले लग्न नव्हते. त्याने आपले पहिले लग्न लपवून मुस्कानशी विवाह केला होता. त्याची पहिली पत्नी इंदूरमध्ये राहते ही बाब लग्नानंतर काही दिवसांतच समोर आली होती. या गुपिताचा उलगडा झाल्यानंतर दांपत्यामध्ये वारंवार तीव्र वाद आणि भांडणे होत होती. या वैवाहिक कलहाचा संदर्भ देत वडिलांनी मुस्कानच्या हत्येचा संशय अधिक बळकट केला आहे. मुस्कान २८ ऑक्टोबर रोजी होणाऱ्या रेल्वे ज्युनियर इंजिनियर पदाच्या परीक्षेची तयारी करण्यासाठी १० ऑक्टोबर रोजी झाशीतील आपल्या माहेरी आली होती. २३ ऑक्टोबर रोजी निलेश झाशीत आला आणि आत्याला भेटायला जाण्याच्या बहाण्याने तिला घराबाहेर घेऊन गेला. परंतु तो तिला आत्याकडे न नेता थेट हॉटेलमध्ये घेऊन गेला, असा दावा अहिरवार यांनी केला आहे.
शुक्रवारी रात्री हॉटेलमध्ये राहिल्यानंतर शनिवारी सकाळी ही संशयास्पद घटना घडली. पोलिसांनी या घटनेचे गांभीर्य लक्षात घेऊन निलेशला ताब्यात घेतले असून त्याची कसून चौकशी सुरू आहे. मुस्कानचा मृतदेह उत्तरीय तपासणीसाठी पाठवण्यात आला असून शवविच्छेदन अहवाल आल्यानंतरच तिच्या मृत्यूचे खरे कारण आणि डोक्यावरील दुखापतींचे स्वरूप स्पष्ट होणार आहे. पोलीस सध्या सीसीटीव्ही फुटेजचे तांत्रिक विश्लेषण करत असून हॉटेल कर्मचाऱ्यांचे जबाब नोंदवले जात आहेत. लग्नानंतर अवघ्या चार महिन्यांत घडलेल्या या धक्कादायक घटनेमुळे सर्वत्र हळहळ व्यक्त होत असून पोलीस तपासात काय सत्य बाहेर येते याकडे सर्वांचे लक्ष लागले आहे.
