पणजी: दक्षिण गोवा जिल्हाधिकारी आणि जिल्हा दंडाधिकारी यांच्या विशेष निर्देशांनुसार जिल्ह्यातील मामलेदार व सह-मामलेदारांनी 'म्युटेशन' प्रकरणांचा जलद गतीने निपटारा करण्यासाठी १७ ऑक्टोबर रोजी विशेष शिबिराचे आयोजन केले होते. या विशेष शिबिरादरम्यान एकूण २१० प्रलंबित प्रकरणांवर तात्काळ सुनावणी घेऊन ती निकालात काढण्यात आल्याची माहिती दक्षिण गोवा जिल्हाधिकाऱ्यांनी दिली आहे.
या विशेष उपक्रमात जिल्ह्यातील सर्व मामलेदार आणि सह-मामलेदारांनी प्रत्यक्ष सहभागी होऊन प्रलंबित अर्जांवर कायदेशीर कार्यवाही पूर्ण केली. निकालात काढण्यात आलेल्या २१० प्रकरणांपैकी साष्टी तालुक्यात सर्वाधिक १३० प्रकरणांचा निपटारा करण्यात आला, तर मुरगाव तालुक्यातील ४७ आणि फोंडा तालुक्यातील ३३ प्रकरणांचा समावेश आहे. प्रशासनाच्या या थेट आणि लोकाभिमुख उपक्रमामुळे अनेक नागरिकांना मोठा दिलासा मिळाला असून महसूल विभागातील कामांचा खोळंबा कमी होण्यास मदत झाली आहे.
उर्वरित प्रलंबित अर्जांवर नियमित कामकाजादरम्यान सुनावणी घेतली जाणार असून, नागरिकांच्या सोयीसाठी येत्या २४ ऑक्टोबर २०२६ रोजी पुढील विशेष म्युटेशन शिबिराचे आयोजन केले जाणार आहे. सरकारी कार्यालयांमधील प्रलंबित म्युटेशन प्रकरणांची संख्या लवकरात लवकर शून्य करणे आणि नागरिकांना वेळेत व पारदर्शकपणे महसूल सेवा उपलब्ध करून देणे, हा या विशेष शिबिरांचा मुख्य उद्देश असल्याचे प्रशासनाने स्पष्ट केले आहे.