‘इनफ इज इनफ’च्या कोअर समितीच्या बैठकीत रणनीती निश्चित
पणजी : न्या. फेर्दिन रिबेलो यांच्या नेतृत्वाखालील ‘इनफ इज इनफ’ या चळवळीचा राज्यभर विस्तार करण्यासाठी जोरदार रणनीती तयार करण्यात आली आहे. संघटना अधिक बळकट करण्यासाठी राज्यातील १२ तालुक्यांमध्ये समित्या स्थापन केल्या जाणार असून, मांडवी नदीतील नवे कॅसिनो आणि टीसीपीच्या वादग्रस्त कलम १७(अ) विरोधात उच्च न्यायालयात धाव घेतली जाणार आहे.
चळवळीच्या कोअर समितीच्या बैठकीत संघटनेच्या विस्ताराबाबत महत्त्वाचे निर्णय घेण्यात आले. यामध्ये उत्तर आणि दक्षिण गोव्याची जबाबदारी अनुभवी कार्यकर्त्यांकडे सोपवण्यात आली आहे.
| विभाग | जबाबदारी सोपवलेले कार्यकर्ते |
|---|---|
| उत्तर गोवा | स्वप्नेश शेर्लेकर, फ्रान्सिस कुएल्हो, गोविंद शिरोडकर आणि देविदास आमोणकर |
| दक्षिण गोवा | क्लिओफात कुतिन्हो, सेराफिन डायस, एल्विस गोम्स आणि संदेश प्रभुदेसाई |
मांडवी नदीत येणाऱ्या नव्या कॅसिनोंविरोधात सोमवारी उच्च न्यायालयात याचिका दाखल केली जाणार आहे. १ एप्रिल २०२३ ते ११ जानेवारी २०२६ या काळात गेमिंग झोनसाठी कोणतीही अधिसूचना जारी न करता परवानगी दिल्याने हा कायदेशीर लढा पुकारला जाणार आहे. यासोबतच, नगरनियोजन खात्याचे (TCP) कलम १७(अ) रद्द करण्यासाठीही स्वतंत्र याचिका दाखल केली जाईल.
राज्याच्या वहनक्षमतेचा अभ्यास करण्याची सरकारची इच्छा दिसत नाही, असा आरोप न्या. रिबेलो यांनी केला आहे. मूलभूत सुविधांची टंचाई आणि भूजल पातळीतील घट यामुळे असा अभ्यास झाल्यास सरकार उघडे पडेल, अशी भीती सरकारला वाटत असल्याचे त्यांनी नमूद केले.
| उपक्रम | तपशील / वेळ |
|---|---|
| वेबसाईट लाँच | पुढील ५ ते ७ दिवसांत लोकांशी संपर्कासाठी संकेतस्थळ सुरू होईल |
| कार्यालय उद्घाटन | पणजीतील जुन्या कार्यालयाचे उद्घाटन बुधवारी केले जाईल |
