सावधान! देशातील 'ही' ३२ विद्यापीठे बनावट; युजीसीने जाहीर केली यादी

नवी दिल्ली: देशातील उच्चशिक्षण व्यवस्थेत मोठी खळबळ उडवणारी घोषणा करत विद्यापीठ अनुदान आयोगाने (UGC) देशभरातील ३२ संस्थांना ‘बनावट विद्यापीठ’ म्हणून जाहीर केले आहे. या संस्थांकडे केंद्र किंवा राज्य सरकारची कोणतीही मान्यता नसून, त्यांनी दिलेल्या पदव्या नोकरी व पुढील शिक्षणासाठी वैध नसल्याचे स्पष्ट करण्यात आले आहे.

यूजीसीने प्रसिद्ध केलेल्या निवेदनात ‘यूजीसी कायदा कलम २(एफ) आणि ३’ चा उल्लेख करत या संस्थांना पदवी प्रदान करण्याचा कोणताही कायदेशीर अधिकार नसल्याचे नमूद केले आहे. विद्यार्थ्यांनी प्रवेश घेण्यापूर्वी संबंधित संस्थेची मान्यता तपासूनच निर्णय घ्यावा, असे आवाहनही आयोगाने केले आहे.

दिल्लीमध्ये सर्वाधिक १२ बनावट विद्यापीठे

राज्यांनुसार पाहता दिल्लीमध्ये सर्वाधिक १२ बनावट विद्यापीठे आढळली आहेत. त्यापाठोपाठ उत्तर प्रदेशमध्ये ४ संस्था बनावट असल्याचे जाहीर करण्यात आले आहे.

राज्यनिहाय बनावट विद्यापीठांची संख्या (फेब्रुवारी २०२६ पर्यंत):

दिल्ली: १२, उत्तर प्रदेश: ४, आंध्र प्रदेश: २, कर्नाटक: २, केरळ: २, महाराष्ट्र: २, पुड्डुचेरी: २, पश्चिम बंगाल: २, अरुणाचल प्रदेश: १, हरियाणा: १, झारखंड: १, राजस्थान: १.

महाराष्ट्रातील दोन संस्था यादीत:

महाराष्ट्रातील नागपूर येथील 'राजा अरेबिक युनिव्हर्सिटी' आणि सोलापूर येथील 'नॅशनल बॅकवर्ड कृषी विद्यापीठ' या दोन संस्थांचा या यादीत समावेश आहे.

विद्यार्थ्यांना सतर्कतेचे आवाहन

यूजीसीने स्पष्ट केले आहे की, या बनावट संस्थांकडून देण्यात येणाऱ्या पदव्या कोणत्याही शासकीय किंवा खासगी नोकरीसाठी ग्राह्य धरल्या जाणार नाहीत. विद्यार्थी आणि पालकांनी प्रवेशापूर्वी विद्यापीठाचे नाव यूजीसीच्या अधिकृत संकेतस्थळावर तपासावे, असे आवाहन आयोगाकडून करण्यात आले आहे.