५५० व्या वर्धापनदिनानिमित्त भव्य सोहळा : कार्यक्रम सर्वांसाठी खुला
पणजी : श्री संस्थान गोकर्ण पर्तगाळी जीवोत्तम मठाच्या ५५० व्या वर्धापनदिनानिमित्त आयोजित भव्य सोहळ्यासाठी पंतप्रधान नरेंद्र मोदी शुक्रवारी (दि. २८) गोव्यात येत आहेत. या ऐतिहासिक प्रसंगी त्यांच्या हस्ते दक्षिण आशियातील सर्वात मोठ्या अशा प्रभू श्रीरामांच्या ७७ फूट उंच मूर्तीचे अनावरण करण्यात येणार आहे.
दक्षिण गोव्यातील काणकोण येथे दक्षिण आशियातील सर्वात मोठ्या श्रीरामाच्या मूर्तीचे अनावरण होणार आहे. या मूर्तीची उंची ७७ फूट असून, यामुळे गोव्याच्या आध्यात्मिक वैभवात मोठी भर पडणार आहे.
पंतप्रधान मोदी दुपारी दाबोळी विमानतळावरून थेट काणकोण येथील पर्तगाळी मठात जातील. मूर्ती अनावरण सोहळ्यानंतर ते पुन्हा दिल्लीला रवाना होतील. या मुख्य सोहळ्याला मुख्यमंत्री डॉ. प्रमोद सावंत, मठाच्या केंद्रीय समितीचे अध्यक्ष श्रीनिवास धेंपो आणि इतर मान्यवर उपस्थित राहणार आहेत. दुपारनंतर हा सोहळा सर्व भाविकांसाठी खुला असेल.
मठाच्या ५५० व्या वर्धापनदिनाचे औचित्य साधून पंतप्रधान ५५० रुपयांच्या विशेष नाण्याचे लोकार्पण करतील. याची वैशिष्ट्ये खालीलप्रमाणे :
आध्यात्मिक पर्यटनाला मिळणार चालना
उत्तर गोव्यात पणजी येथे सरकारने भगवान परशुरामाचा पुतळा उभारला आहे, तर आता दक्षिण गोव्यात ७७ फूट उंच श्रीरामाची मूर्ती उभी राहिली आहे. यामुळे राज्यात आध्यात्मिक पर्यटनाला मोठी गती मिळणार आहे. गोव्यातील पर्तगाळी मठाला ५५० वर्षे पूर्ण होत आहेत, यावरून गोव्यात शेकडो वर्षांपासून आध्यात्मिक परंपरा अविरत सुरू असल्याचे सिद्ध होते, असे मत मुख्यमंत्री डॉ. प्रमोद सावंत यांनी व्यक्त केले.
पंतप्रधानांच्या दौऱ्याच्या पार्श्वभूमीवर पर्तगाळी मठ आणि परिसरात कडेकोट सुरक्षा व्यवस्था तैनात करण्यात आली असून वाहतूक विभागाने विशेष मार्गदर्शिका जारी केली आहे.
