सूर्यकुमारच्या फिटनेसवर लक्ष : भारतीय संघात मोठे बदल अटळ
मुंबई : इंग्लंडमधील यशस्वी दौऱ्यानंतर आता भारतीय क्रिकेट संघ पुढील महिन्यात होणाऱ्या आशिया कपसाठी सज्ज झाला आहे. या स्पर्धेसाठी भारतीय संघाची निवड १९ किंवा २० ऑगस्ट रोजी होण्याची शक्यता आहे. बंगळुरू येथील नॅशनल क्रिकेट अकॅडमीच्या (एनसीए) स्पोर्ट्स सायन्स टीमने खेळाडूंच्या फिटनेसचा मेडिकल रिपोर्ट बीसीसीआयला सादर केल्यानंतर, निवड समिती संघाची घोषणा करेल. यात प्रामुख्याने कर्णधार सूर्यकुमार यादव याच्या फिटनेसवर निवड समितीचे लक्ष आहे.
सूर्या फिट न झाल्यास शुभमनला कर्णधारपद
हर्नियाच्या शस्त्रक्रियेतून सावरत असलेला सूर्यकुमार यादव सध्या बंगळुरू येथील एनसीएमध्ये नेट्समध्ये सराव करत आहे. जर तो वेळेत पूर्णपणे फिट झाला नाही, तर निवड समिती शुभमन गिलला आशिया कपसाठी संघाचे नेतृत्व देण्याचा विचार करू शकते.
टॉप ऑर्डरमध्ये बदल नाही
अभिषेक शर्मा, संजू सॅमसन, सूर्यकुमार यादव, तिलक वर्मा आणि हार्दिक पांड्या यांचा समावेश टॉप ऑर्डरमध्ये कायम राहण्याची शक्यता आहे. बीसीसीआयच्या एका अधिकाऱ्याने सांगितले की, अभिषेक शर्मा सध्या टी-२० क्रमवारीत पहिल्या क्रमांकावर आहे, तर संजू सॅमसननेही गेल्या मोसमात उत्कृष्ट कामगिरी केली आहे. गिलची कामगिरी चांगली असली तरी, त्याला टॉप ऑर्डरमध्ये संधी मिळणे कठीण आहे. पण सूर्या फिट न झाल्यास त्याला कर्णधारपद मिळू शकते.
बुमराह, दुबेला संधी, जुरेल-जितेशमध्ये चुरस
दुखापतीतून पूर्णपणे सावरलेला वेगवान गोलंदाज जसप्रीत बुमराह आशिया कपसाठी पूर्णपणे फिट असून त्याचा संघात समावेश निश्चित मानला जात आहे. तसेच, दुखापतग्रस्त नितीश रेड्डीच्या जागी अष्टपैलू शिवम दुबेला संधी मिळू शकते. यष्टिरक्षक म्हणून संजू सॅमसनसोबत ध्रुव जुरेल किंवा जितेश शर्मा यांच्यापैकी एकाची निवड होण्याची शक्यता आहे.
ऋषभ पंत, जयस्वालचा पत्ता कट?
आयपीएलच्या इतिहासातील सर्वात महागडा खेळाडू ठरलेला ऋषभ पंत सध्या भारतीय टी-२० संघात पुनरागमन करण्यासाठी संघर्ष करत आहे. कसोटीमध्ये त्याची कामगिरी उत्कृष्ट असली, तरी टी-२० मध्ये त्याला अपेक्षित यश मिळालेले नाही. मागील पाच आंतरराष्ट्रीय टी-२० सामन्यांमध्ये त्याने १७.५० च्या सरासरीने केवळ ७० धावा केल्या, ज्यात त्याचा स्ट्राइक रेट १२७.२६ होता. यामुळे, त्याची निवड होण्याची शक्यता कमी आहे. त्याचप्रमाणे, यशस्वी जयस्वाल, साई सुदर्शन आणि केएल राहुल यांनाही या संघात स्थान मिळण्याची शक्यता कमी असल्याचे वृत्त आहे.
आशिया कपमधील भारताचे सामने
आशिया कपमध्ये भारताचा पहिला सामना १० सप्टेंबरला होणार आहे, तर क्रिकेटप्रेमींना उत्सुकता असलेला भारत-पाकिस्तान सामना १४ सप्टेंबरला होणार आहे. या सामन्यांमध्ये भारतीय संघाची कामगिरी कशी होते, हे पाहणे महत्त्वाचे ठरणार आहे.
भारताची संभाव्य टीम :
सूर्यकुमार यादव (कर्णधार), शुभमन गिल, अभिषेक शर्मा, संजू सॅमसन, तिलक वर्मा, हार्दिक पांड्या, शिवम दुबे, अक्षर पटेल, वॉशिंग्टन सुंदर, कुलदीप यादव, वरुण चक्रवर्ती, जसप्रीत बुमराह, अर्शदीप सिंग, हर्षीत राणा, जितेश शर्मा/ध्रुव जुरेल.
