एका महिलेची सुटका : गुन्हा शाखेने बंगळुरूत घेतले ताब्यात
पणजी : हॉटेल व्यवसायात नोकरीचे आमिष दाखवून विदेशी महिलांना गोव्यात आणून वेश्या व्यवसाय करण्यास भाग पाडणाऱ्या आंतरराष्ट्रीय टोळीचा गोवा पोलिसांच्या गुन्हा शाखेने पर्दाफाश केला आहे. या प्रकरणी मुख्य सूत्रधार नॅन्सी किंगोरी उर्फ आलियान या केनियन महिलेला बंगळुरू येथून अटक केली. तर, गुन्हा शाखेने एका केनियन महिलेची सुटका केली.
गोवा पोलिसांच्या गुन्हा शाखेने दिलेल्या माहितीनुसार, पीडित महिलेने ३ मार्च २०२५ रोजी या प्रकरणी तक्रार दाखल केली आहे. त्यानुसार, मुख्य सूत्रधार नॅन्सी किंगोरी उर्फ आलियान या केनियन महिलेने एका केनियक महिलेला हॉटेल व्यवसायात नोकरीचे आमिष दाखवून नोव्हेंबर २०२४ मध्ये गोव्यात आणले होते. त्यानंतर तक्रारदार महिलेचा पासपोर्ट व इतर दस्तावेज संशयितांनी जप्त केले. तिला १८ नोव्हेंबर २०२४ रोजीपासून संशयितांनी वेश्या व्यवसाय करण्यास भाग पाडले होते. या प्रकरणातून पीडित महिलेने बिगर सरकारी संस्थेच्या मदतीने सुटका करुन घेतली आणि गुन्हा शाखेत तक्रार दाखल केली. याची दखल घेऊन गुन्हा शाखेचे निरीक्षक प्रशल नाईक देसाई यांनी मुख्य सूत्रधार नॅन्सी किंगोरी उर्फ आलियान हिच्या विरोधात भारतीय न्याय संहितेच्या कलम १४३ आणि मानवी तस्करी प्रतिबंधक कायद्याचे कलम ४,५ व ८ अंतर्गत गुन्हा दाखल करून तपास सुरू केला. याच दरम्यान मुख्य सूत्रधार नॅन्सी किंगोरी बंगळुरू - कर्नाटकमध्ये असल्याची माहिती मिळाली. त्यानुसार, पोलीस अधीक्षक राहुल गुप्ता आणि उपअधीक्षक राजेश कुमार यांच्या मार्गदर्शनाखाली पोलीस निरीक्षक प्रशल नाईक देसाई यांच्या नेतृत्वाखाली महिला उपनिरीक्षक प्रगती मळीक व इतर पथकाला बंगळुरूमध्ये रवाना करण्यात आले. बंगळुरू येथे दाखल झाल्यावर पथकाने दि. १३ रोजी मुख्य सूत्रधार नॅन्सी किंगोरी उर्फ आलियान हिच्या मुसक्या आवळल्या. त्यानंतर तिला गोव्यात आणले.
नॅन्सीला ७ दिवस पोलीस कोठडी
महिलांना वेश्या व्यवसाय करण्यास भाग पाडणाऱ्या मुख्य सूत्रधार नॅन्सी किंगोरी हिला अटक करुन गोव्यात आणले. यानंतर म्हापसा येथील प्रथमवर्ग न्यायालयात हजर करण्यात आले. न्यायालयाने नॅन्सी किंगोरी हिला सात दिवसांची पोलीस कोठडी ठोठावली आहे.
