अग्निशमन दलातील कर्मचाऱ्यांच्या बढत्या १९ वर्षांपासून रखडल्या

फोंडा :गोव्यातील अग्निशमन दलाच्या कर्मचाऱ्यांची पदोन्नती गेल्या १९ वर्षांपासून, म्हणजेच २००७ पासून रखडल्याचा आरोप होत आहे. इतर सरकारी खात्यांमध्ये कर्मचाऱ्यांना पदोन्नती दिली जात असताना अग्निशमन दलातील कर्मचारी मात्र त्यापासून वंचित असल्याचे सांगण्यात येत आहे. या कर्मचाऱ्यांमध्ये अनुसूचित जमातीच्या (एसटी) जवळपास २०० जणांचा समावेश असून, सरकारने या प्रश्नाकडे गांभीर्याने लक्ष देण्याची मागणी होत आहे.

अग्निशमन दलातील कर्मचारी आणि अधिकाऱ्यांनी पदोन्नतीच्या प्रश्नावर अनेकदा खात्याच्या संचालकांना निवेदने दिली आहेत. मात्र, अद्याप या निवेदनांची दखल घेण्यात आलेली नसल्याचे कर्मचाऱ्यांचे म्हणणे आहे. अग्निशमन दलाचे कर्मचारी आपला जीव धोक्यात घालून सर्वसामान्य नागरिकांना सेवा देतात. असे असतानाही त्यांना एकाच पदावर वर्षानुवर्षे काम करावे लागत असल्याने कर्मचाऱ्यांमध्ये अन्यायाची भावना निर्माण झाली आहे.

राजकीय इच्छाशक्तीचा अभाव

राज्यात अनुसूचित जमातीला राजकीय आरक्षण मिळवून देण्यासाठी विविध प्रयत्न सुरू आहेत. मात्र, याच समाजातील अग्निशमन दलात सेवा बजावणाऱ्या कर्मचाऱ्यांना पदोन्नती मिळवून देण्यासाठी समाजबांधव किंवा राजकीय नेते पुढाकार घेत नसल्याची खंत कर्मचाऱ्यांकडून व्यक्त केली जात आहे. केवळ राजकीय फायद्यासाठीच नेत्यांचा वावर असल्याचा आरोपही काही कर्मचाऱ्यांनी केला आहे.

आगामी विधानसभा निवडणुकीच्या पार्श्वभूमीवर तरी आपली दीर्घकाळ प्रलंबित मागणी पूर्ण होईल, अशी आशा कर्मचाऱ्यांनी व्यक्त केली आहे.

पदोन्नतीसाठी समाजाच्या वतीने निवेदन देणार

सरकारच्या विविध खात्यांमधील अनुसूचित जमातीच्या कर्मचाऱ्यांना वेळोवेळी बढती दिली जाते. मात्र, अग्निशमन दलातील कर्मचाऱ्यांना गेली १९ वर्षे पदोन्नती मिळालेली नाही. सर्व प्रलंबित कर्मचाऱ्यांना बढती मिळणे आवश्यक असून, त्यासाठी समाजाच्या वतीने अग्निशमन दलाच्या संचालकांना निवेदन दिले जाईल, असे गोमंतक गौड मराठा समाजाचे (रजिस्टर नंबर १०८) अध्यक्ष मधू नागू गावकर यांनी सांगितले.

बढती न दिल्यामुळे अधिकाऱ्यांमध्येही नाराजी

पदोन्नतीचा प्रश्न, कर्मचाऱ्यांची दीर्घ प्रतीक्षा आणि कुशावती जिल्ह्यातील विभागीय अग्निशमन कार्यालयाचा अभाव या मुद्द्यांवर सरकार कोणती भूमिका घेते, याकडे अग्निशमन दलातील कर्मचारी आणि संबंधित समाजाचे लक्ष लागले आहे.