पणजी : सध्याची काँग्रेस ही पूर्वीची काँग्रेस राहिलेली नाही. आता पक्षात नवे नेतृत्व आणि नवी ऊर्जा आहे. त्यामुळे यंदाच्या निवडणुकीत इतर पक्षांआधी काँग्रेसचे उमेदवार जाहीर केले जातील, असे काँग्रेसचे विधिमंडळ नेते युरी आलेमाव यांनी सांगितले. ‘प्रुडंट मीडिया’च्या ‘हेड ऑन’ या कार्यक्रमात बोलताना त्यांनी ही माहिती दिली.
रविवारी काँग्रेस नेते राहुल गांधी यांच्या उपस्थितीत ‘गोवा राखण यात्रे’चा समारोप झाला. त्यानंतर युरी आलेमाव यांनी काँग्रेसच्या निवडणूक तयारीबाबत आपली भूमिका स्पष्ट केली.
आगामी निवडणुकीत काँग्रेसचा विजय निश्चित असल्याचा विश्वास युरी आलेमाव यांनी व्यक्त केला. राज्यातील भाजपचे ७५ टक्के आमदार आणि मंत्री निवडणुकीत पराभूत होतील, असा दावाही त्यांनी केला. भाजपचे संघटनमंत्री बी. एल. संतोष यांनीही मंत्री आणि आमदारांना इशारा दिल्याचे युरी आलेमाव यांनी नमूद केले.
भाजप सरकार भ्रष्टाचाराने ग्रासलेले असून, गोव्यातील जनता या सरकारला कंटाळली आहे, असा आरोप युरी आलेमाव यांनी केला. त्यामुळे ‘गोवा राखण यात्रेला’ मोठा प्रतिसाद मिळाला. गोव्याचे रक्षण करण्यासाठी भाजपला पराभूत करणे आवश्यक आहे, असेही ते म्हणाले.
भाजपला पराभूत करण्यासाठी सर्व विरोधी पक्षांनी एकत्र येण्याची गरज असल्याचे युरी आलेमाव यांनी सांगितले. काँग्रेस आणि रिव्होल्युशनरी गोवन्स (आरजी) यांच्यात चर्चा होऊन युती निश्चित झाली आहे. गोवा फॉरवर्डकडूनही सकारात्मक प्रतिसाद मिळाला आहे. आरजीसोबत चर्चा करून समान कार्यक्रमही तयार करण्यात आला आहे, असे त्यांनी स्पष्ट केले.
कोणत्याही विरोधी पक्षासोबत आपल्याला अडचण नाही. मात्र, युतीबाबतची ठोस भूमिका काँग्रेसचे प्रदेशाध्यक्षच जाहीर करू शकतात, असे युरी आलेमाव यांनी स्पष्ट केले.
गोव्यातील जनता भाजप सरकारला कंटाळली असल्याने भाजपचे आमदार आणि मंत्र्यांसमोर मोठे आव्हान आहे. भाजपचे ७५ टक्के आमदार आणि मंत्री निवडणुकीत पराभूत होतील, असा दावा त्यांनी पुन्हा केला.
जनजागृतीसाठी यात्रा काढणे हा महात्मा गांधी यांच्या विचारसरणीचा भाग आहे. ‘गोवा राखण यात्रे’ला मिळालेला प्रतिसाद हा जनतेच्या जागरूकतेचे प्रतीक आहे, असे युरी आलेमाव यांनी सांगितले.