पेडणे तालुक्यातील शेतकरी, बागायतदार धास्तावले
पत्रादेवी फकीर फाटा येथे ओंकार हत्तीचे झालेले दर्शन. (निवृत्ती शिरोडकर)
प्रतिनिधी। गोवन वार्ता
पेडणे : दोन महिने सिंधुदुर्ग जिल्ह्याचा पाहुणचार घेऊन ६३ दिवसांनंतर ‘ओंकार’ हत्ती पुन्हा गोव्याच्या सीमेत दाखल झाला आहे. रविवारी दुपारी पत्रादेवी फकीर फाटा येथे तो लोकांच्या दृष्टीस पडला. ‘ओंकार’च्या पुनरागमनाने शेतकरी, बागायतदार धास्तावले आहेत. वन खात्याचे रक्षक कर्मचारी ओंकार हत्तीवर नजर ठेवून आहेत. ते गंडेल लावून हत्तीला इतरात्र पिटाळून लावण्याचा प्रयत्न करत आहेत.
दोन महिन्यांपूर्वी ओंकार हत्तीने मोपा फकीर फाटा, तोरसे, तांबोसे परिसरात धुमाकूळ घालून सहा लाख रुपयांहून अधिकचे शेतकऱ्यांचे नुकसान केले होते. त्यानंतर त्याने सिंधुदुर्ग जिल्ह्यातील बांदा, इन्सुली, आंबोली भागात शेतातील पिकांचे, बागायतीचे मोठ्या प्रमाणात नुकसान केले. आता ओंकार हत्ती गोव्याच्या पेडणे भागात दाखल झाला आहे. त्यामुळे येथील शेतकरी, बागायतदार भयभीत झाले आहेत.
‘ओंकार’ हत्ती कर्नाटकमध्ये वावरणाऱ्या कळपातील असून वाट चुकून तो गोव्यात आला होता. सुरुवातीला मोपा नंतर तोरसे, तांबोसे भागात त्याचे वास्तव्य होते. त्याने मोठ्या प्रमाणात भात शेती, कवाथे, सुपारीची झाडे यांची नासधूस केली होती. दहा दिवसानंतर ‘ओंकार’ सिंधुदुर्गात गेला होता. तेथे ६३ दिवस राहून आता तो परत गोव्यात आला आहे.
वन खाते पुन्हा सक्रिय
‘ओंकार’ हत्तीने रविवारी पत्रादेवी फकीर फाटा भागात प्रवेश केल्याची बातमी वन खात्याला कळताच वन खात्याची झोप उडाली आहे. वन खात्याचे कर्मचारी ‘ओंकार’चा बंदोबस्त करण्यासाठी त्यांच्या मागोमाग गंडेल हातात घेऊन जात असल्याचे चित्र फकीर फाटा येथे दिसून आले. गोव्याच्या हद्दीतून बाहेर जाईपर्यंत वन खात्याच्या कर्मचाऱ्यांना ‘ओंकार’वर लक्ष ठेवावे लागणार आहे.
