नांदेड : नांदेड शहरातील जुना गंजीपेठ परिसरात गुरुवारी संध्याकाळी ५.२० वाजता घडलेल्या एका हत्येने संपूर्ण शहर हादरून गेले. २४ वर्षीय सक्षम ताटे याची त्याच्या प्रेयसीच्या कुटुंबियांनी निर्घृण हत्या केली. जातीय भेदभाव आणि प्रेमसंबंधांचा विरोध या पार्श्वभूमीवर घडलेली ही घटना सामाजिक असहिष्णुतेचे भीषण उदाहरण ठरली आहे.
वडिल-भाऊंचा कट; प्रेयसीने मृतदेहाशी लग्न करून न्यायाची मागणी
सक्षम ताटे आणि आंचल मामीलवाड यांचे गेल्या तीन वर्षांपासून प्रेमसंबंध होते. सक्षम वेगळ्या जातीतला असल्यामुळे आंचलच्या कुटुंबियांचा या नात्याला तीव्र विरोध होता. याआधी सक्षमला धमक्या देण्यात आल्या होत्या, पण प्रेम थांबले नाही. अखेर आंचलचे वडील गजानन मामीलवाड, भाऊ साहील ठाकूर आणि त्यांच्या साथीदारांनी मिळून सक्षमवर गोळ्या झाडल्या आणि फरशी डोक्यात घालून ठार मारले.
हत्येनंतर सक्षमचे पार्थिव जेव्हा अंत्यसंस्कारासाठी घरी आणले गेले, तेव्हा आंचलने उपस्थित सर्वांना अश्रूंनी हेलावून टाकणारे पाऊल उचलले. तिने सक्षमच्या नावाचे कुंकू कपाळावर लावले, मंगळसूत्र घातले आणि मृत प्रियकरालाही हळद लावून लग्नाचे विधी पूर्ण केले. ढसाढसा रडत तिने जाहीरपणे म्हटले, “माझे वडील आणि भाऊ हरले, मरूनही माझा प्रियकर जिंकला.”
आंचलने स्पष्टपणे सांगितले की, सक्षम जेलमधून बाहेर आल्यानंतरच तिच्या कुटुंबियांनी खुनाचा कट रचला होता. ती आपल्या वडिलांना आणि भावाला फाशीची शिक्षा व्हावी, अशी मागणी करत आहे.
पोलिसांनी गजानन मामीलवाड, साहील ठाकूर, जयश्री ठाकूर, सोमेश लखे आणि वेदांत यांना अटक केली असून, त्यांच्याविरुद्ध खुनाचा गुन्हा दाखल करण्यात आला आहे. नांदेड शहरात या घटनेने प्रचंड खळबळ माजली आहे आणि स्थानिक समाजाने या घटनेवर तीव्र प्रतिक्रिया व्यक्त केली आहे.