सुकाणू समितीच्या बैठकीत ५० मतदारसंघांवर चर्चा
पणजी : जिल्हा पंचायत निवडणुकीसाठी भाजपच्या उमेदवारांची पहिली यादी रविवारी जाहीर होईल. मगोसोबत युती असल्यामुळे काही जागा मगो पक्षाला देण्याचा निर्णय घेण्यात आला आहे, अशी माहिती भाजप प्रदेशाध्यक्ष दामू नाईक यांनी दिली.
सुकाणू समितीची बैठक आणि जागावाटप
सुकाणू समितीच्या बैठकीत सर्व ५० मतदारसंघांतील उमेदवारांवर चर्चा झाली. उमेदवार निश्चित करण्याची प्रक्रिया सुरू असून, रविवारी सायंकाळपर्यंत २५ ते ३० उमेदवारांची यादी जाहीर करण्याचा प्रयत्न आहे. काही नावे निश्चित असून काहींची चर्चा सुरू आहे. मगो पक्षाला काही जागा देण्यात आल्या असून आणखी काही जागा सोडाव्यात का, याबाबतही चर्चाच सुरू असल्याचे दामू नाईक यांनी सांगितले.
दिग्गज नेत्यांची उपस्थिती
जिल्हा पंचायत निवडणुकीची आचारसंहिता शनिवारी लागू झाली असून उमेदवारी अर्ज स्वीकारण्यास सोमवारी सुरुवात होईल. निवडणुकीची प्रक्रिया जाहीर झाल्यानंतर भाजपच्या सुकाणू समितीची बैठक पणजीत झाली. या बैठकीस मुख्यमंत्री डॉ. प्रमोद सावंत, आरोग्यमंत्री विश्वजीत राणे, कला व संस्कृती मंत्री रमेश तवडकर, सार्वजनिक बांधकाम मंत्री दिगंबर कामत, केंद्रीय मंत्री श्रीपाद नाईक, पंचायत मंत्री माविन गुदिन्हो, खासदार सदानंद शेट तानवडे, माजी मंत्री चंद्रकांत कवळेकर आणि ॲड. नरेंद्र सावईकर उपस्थित होते.
निवडीचे निकष आणि पक्षाचा पाठिंबा
निष्ठा, जनाधार आणि कामाचा दर्जा या निकषांवर उमेदवारांची निवड केली जात आहे, असे दामू नाईक यांनी स्पष्ट केले. पक्ष ज्यालाही उमेदवारी देईल, त्याच्या पाठीशी आम्ही पूर्ण ताकदीने उभे राहू. पक्षाचे सर्व उमेदवार पुढील दोन दिवसांत जाहीर केले जातील, अशी माहिती बैठक संपल्यानंतर आरोग्यमंत्री विश्वजीत राणे यांनी दिली.
‘आप’ स्वबळावर लढणार
आम आदमी पक्षाने स्वतंत्रपणे निवडणूक लढवण्याचा निर्णय घेत उमेदवार जाहीर केले आहेत. काँग्रेस, गोवा फॉरवर्ड आणि आरजी पक्षांच्या युतीबाबत अजून कोणताही निर्णय झालेला नाही. फक्त २० दिवस उरले असतानाही युतीसंदर्भात कोणताही निर्णय घेण्यात आलेला नाही. त्यामुळे स्वतंत्रपणे निवडणूक लढवण्याचा निर्णय आम्ही घेतला, असे ‘आप’चे प्रदेशाध्यक्ष अमित पालेकर यांनी सांगितले.
