नागरिकांना सतर्क राहण्याचे पोलिसांचे आवाहन : लिंकवर क्लिक केल्याने दोघांनी गमावले पैसे
पणजी : पार्सलसंबंधी बनावट संदेश (एसएमएस) पाठवून पैसे उकळण्याचे प्रकार गोव्यात वाढू लागले आहेत. या पार्श्वभूमीवर अशा संदेशांपासून सावध राहावे, अशी सूचना पोलिसांनी जारी केली आहे. खोट्या संदेशांना बळी पडून दोघांनी पैसे गमावल्याने नागरिकांनी सतर्कता बाळगावी, असे आवाहन पोलिसांनी केले.
"अपुरी माहिती असल्याने तुमचे पार्सल वितरित करता येत नाही, या लिंकवर क्लिक करून पत्ता पाठवा व रीडिलिव्हरी शुल्क भरा."
काय करावे?
असा संदेश आल्यास लिंकवर क्लिक करू नका. फसवणूक झाल्यास किंवा संशय आल्यास त्वरित ‘१९३०’ या क्रमांकावर पोलिसांना माहिती द्या.
सायबर गुन्हे विभागाची धडक कारवाई
पोलिसांनी दिलेल्या माहितीनुसार, सायबर गुन्हे विभाग ॲक्शन मोडवर आहे. पोलीस अधीक्षक राहुल गुप्ता यांनी कारवाईची आकडेवारी जाहीर केली आहे.
| ब्लॉक केलेल्या वेबसाईट्स | ५०७ |
| ब्लॉक केलेले मोबाईल नंबर | ७६७ |
| सोशल मीडिया खाती (बंद) | १५१ |
गुन्ह्यांचे प्रकार : बनावट पार्सल डिलिव्हरी, ऑनलाईन गुंतवणूक फसवणूक, सेक्सटॉर्शन, डेटिंग ॲप फसवणूक, डिजिटल अरेस्ट आणि बनावट हॉटेल बुकिंग पोर्टल यांसारखे प्रकार सध्या वाढले आहेत.
