‘वॉटर मेट्रो’ प्रकल्प लवकरच होणार सुरू

पणजी : गोव्यात जलवाहतुकीला मोठी गती देण्यासाठी ‘वॉटर मेट्रो’ प्रकल्प लवकरच सुरू करण्यात येणार असल्याची घोषणा मुख्यमंत्री डॉ. प्रमोद सावंत यांनी केली आहे. राज्यात सध्या दररोज ५० हजारांहून अधिक नागरिक फेरीबोटीने प्रवास करतात. हा नवा प्रकल्प सुरू झाल्यानंतर राज्यातील जलवाहतूक क्षेत्रात आमूलाग्र सुधारणा आणि बदल घडून येतील, असा विश्वास मुख्यमंत्र्यांनी व्यक्त केला.
दरम्यान, पणजी येथील ‘कॅप्टन ऑफ पोर्ट्स’ची नवी इमारत पूर्ण झाली असून, येत्या ८ जून रोजी केंद्रीय बंदरे, जहाजबांधणी आणि जलमार्ग मंत्री सर्बानंद सोनोवाल यांच्या हस्ते या भव्य इमारतीचे अधिकृत उद्घाटन करण्यात येणार आहे.
आपला दिल्ली दौरा आटोपून गोव्यात परतल्यानंतर मुख्यमंत्री डॉ. प्रमोद सावंत यांनी पत्रकारांना ही महत्त्वाची माहिती दिली. दिल्लीत असताना मुख्यमंत्र्यांनी इतर केंद्रीय मंत्र्यांसह केंद्रीय मंत्री सर्बानंद सोनोवाल यांची विशेष भेट घेतली होती. या बैठकीदरम्यान गोव्यातील बंदरे आणि जलवाहतुकीशी संबंधित विविध महत्त्वपूर्ण विषयांवर सविस्तर चर्चा करण्यात आली.
गोवा सरकारने केंद्राकडे सादर केलेल्या ‘वॉटर मेट्रो’ प्रकल्पाला केंद्र सरकारने अधिकृत मान्यता दिली आहे. हा महत्त्वाकांक्षी प्रकल्प गोव्यात लवकरात लवकर प्रत्यक्ष जमिनीवर उतरवण्यासाठी केंद्र सरकारकडून आवश्यक असलेल्या सर्व प्रशासकीय आणि तांत्रिक मंजुऱ्यांचे सोपस्कार (प्रक्रिया) तातडीने पूर्ण केले जातील, असे आश्वासन केंद्रीय मंत्र्यांनी दिले आहे.
‘ब्लू इकॉनॉमी’, सागरी किनाऱ्यांच्या विकासावर भर
केंद्रीय मंत्र्यांसोबत झालेल्या या उच्चस्तरीय बैठकीत केवळ जलवाहतूकच नव्हे, तर गोव्याच्या विस्तीर्ण सागरी किनाऱ्यांचा विकास आणि सागरी अर्थव्यवस्था मजबूत करण्यावरही विशेष चर्चा झाली. गोव्यातील सागरी किनाऱ्यांचा राज्याच्या आर्थिक प्रगतीसाठी आणि पर्यटनासाठी पर्यावरणपूरक व योग्य पद्धतीने जास्तीत जास्त वापर कसा करता येईल, तसेच तिथे आधुनिक सुविधा कशा उभारता येतील, याविषयी देखील केंद्र आणि राज्य सरकारमध्ये महत्त्वपूर्ण धोरणात्मक चर्चा झाल्याचे मुख्यमंत्री डॉ. प्रमोद सावंत यांनी शेवटी सांगितले.