जागतिक स्तरावर मात्र उमटवली छाप; 'सिनर्स'ची १६ नामांकनांसह ऐतिहासिक कामगिरी
लॉस एंजेलिस : ९८ व्या अकादमी पुरस्कारांच्या (ऑस्कर २०२६) नामांकनांची घोषणा गुरुवारी करण्यात आली आणि भारतीय चित्रपट रसिकांच्या पदरी पुन्हा एकदा निराशा पडली आहे. दिग्दर्शक नीरज घेवान यांचा बहुचर्चित 'होमबाउंड' हा चित्रपट 'सर्वोत्कृष्ट आंतरराष्ट्रीय फिचर फिल्म' श्रेणीतील अंतिम पाच चित्रपटांच्या शर्यतीत स्थान मिळवण्यात अपयशी ठरला आहे. गेल्या महिन्यात १५ चित्रपटांच्या शॉर्टलिस्टमध्ये स्थान मिळवल्यामुळे भारतीय चाहत्यांच्या अपेक्षा उंचावल्या होत्या, मात्र अत्यंत अटीतटीच्या स्पर्धेत या चित्रपटाचे आव्हान संपुष्टात आले आहे.
विशाल जेठवा आणि ईशान खट्टर यांच्या प्रमुख भूमिका असलेला 'होमबाउंड' हा चित्रपट धर्मा प्रोडक्शन्सची निर्मिती असून तो भारताकडून अधिकृतपणे ऑस्करसाठी पाठवण्यात आला होता. दोन तरुण मित्रांचा संघर्ष आणि त्यांची कथा जागतिक प्रेक्षकांच्या काळजाला भिडली होती. कान चित्रपट महोत्सवातील 'अन सर्टन रिगार्ड' विभागात या चित्रपटाचे प्रीमियर झाले होते, तेव्हापासूनच या चित्रपटाची चर्चा होती. जर या चित्रपटाला अंतिम पाचमध्ये नामांकन मिळाले असते, तर आमिर खानच्या 'लगान'नंतर या श्रेणीत नामांकन मिळवणारा तो पहिला भारतीय चित्रपट ठरला असता. मात्र, ब्राझील, फ्रान्स, नॉर्वे, स्पेन आणि ट्युनिशियाच्या चित्रपटांनी या शर्यतीत बाजी मारली आहे.
या वर्षीच्या ऑस्कर नामांकनांमध्ये दिग्दर्शक रायन कूगलर यांच्या 'सिनर्स' चित्रपटाने १६ नामांकने मिळवून इतिहास रचला आहे. ऑस्करच्या इतिहासातील ही आतापर्यंतची सर्वाधिक नामांकने आहेत. त्यापाठोपाठ 'वन बॅटल आफ्टर अनदर'ला १२ आणि 'मार्टी सुप्रीम'ला १० नामांकने मिळाली आहेत. वैयक्तिक कामगिरीत लिओनार्दो डिकॅप्रिओने 'वन बॅटल आफ्टर अनदर'साठी आपले सहावे 'सर्वोत्कृष्ट अभिनेता' नामांकन पटकावले आहे, तर युवा अभिनेता टिमोथी शॅलमेने 'मार्टी सुप्रीम'साठी सलग तिसऱ्यांदा या शर्यतीत स्थान मिळवून सर्वांचे लक्ष वेधले आहे.
दुसरीकडे, काही मोठे चित्रपट आणि कलाकारांना या नामांकनांमध्ये डावलले गेल्याने आश्चर्याचे धक्केही बसले आहेत. ५२२ दशलक्ष डॉलर्सची कमाई करणाऱ्या 'विक्ड २' या चित्रपटाला एकाही श्रेणीत नामांकन मिळालेले नाही. तसेच प्रसिद्ध दिग्दर्शक गिलर्मो डेल टोरो यांच्या 'फ्रँकेनस्टाईन'लाही दिग्दर्शन श्रेणीत स्थान मिळालेले नाही. अभिनेत्री एम्मा स्टोनने 'बुगोनिया'साठी आपले तिसरे 'सर्वोत्कृष्ट अभिनेत्री' नामांकन मिळवले आहे. जरी 'होमबाउंड' ऑस्करच्या अंतिम शर्यतीतून बाहेर पडला असला, तरी जागतिक व्यासपीठावर भारतीय कथा मांडणारा एक महत्त्वाचा चित्रपट म्हणून त्याचे स्थान कायम राहील.
