पणजी: राज्यात सध्या सुरू असलेल्या विविध पायाभूत सुविधांच्या प्रकल्पांमुळे जनतेला होत असलेल्या त्रासाची दखल राज्यपाल पुसापती अशोक गजपती राजू यांनी घेतली आहे. मात्र, हे प्रकल्प पूर्ण झाल्यानंतर गोव्याच्या दळणवळण क्षेत्रात मोठी क्रांती होईल आणि त्याचे दीर्घकालीन फायदे जनतेला मिळतील, असे त्यांनी सोमवारी विधानसभा अधिवेशनादरम्यान नमूद केले.
सध्या सुरू असलेल्या महत्त्वाच्या कामांचा उल्लेख करताना राज्यपाल म्हणाले की, सांगोल्डा जंक्शन ते हॉटेल मॅजेस्टिकपर्यंतचा एलिव्हेटेड कॉरिडॉर, राष्ट्रीय महामार्ग ६६ ला जोडणारे रस्ते आणि धारगळ येथील उड्डाणपुलाचे काम प्रगतीपथावर आहे. या मोठ्या प्रकल्पांमुळे वाहतुकीवर ताण येत असून दैनंदिन प्रवासात नागरिकांना अडचणींचा सामना करावा लागत आहे, हे वास्तव त्यांनी मान्य केले.
तथापि, हे प्रकल्प पूर्ण होताच राज्यातील अंतर्गत कनेक्टिव्हिटीमध्ये मोठी सुधारणा होईल, असा विश्वास त्यांनी व्यक्त केला. यामुळे प्रवासाच्या वेळेत मोठी बचत होणार असून, पर्यटनासह राज्याच्या आर्थिक व्यवहारांनाही मोठी चालना मिळणार आहे. गोव्याच्या वाहतूक पायाभूत सुविधांचे आधुनिकीकरण करण्यासाठी सरकार कटिबद्ध असल्याचे राज्यपाल यावेळी म्हणाले. रस्ते विकास ही प्रगतीची गरज असून, या विकासकामांच्या काळात नागरिकांनी सहकार्य करावे, असे आवाहनही त्यांनी केले. 'आजची गैरसोय ही उद्याच्या सुखकर प्रवासाचा पाया आहे,' असे सांगत त्यांनी भविष्यातील विकसित गोव्याचे चित्र मांडले.
