म्हापसा: येथील श्री देव बोडगेश्वर जत्रोत्सवस्थळी उभारलेले जायंट व्हील व इतर ॲडव्हेंचर राईड्स बार्देश देवालये प्रशासक कार्यालयाकडून सील करण्यात आले आहेत. जत्रेत उभारलेल्या या संरचनांना सरकारी यंत्रणांची आवश्यक 'ना हरकत प्रमाणपत्रे' आणि सुरक्षा परवाने नसल्याने ही कठोर कारवाई करण्यात आली आहे.
जत्रेत अन्य धर्मीय व्यक्तीने हा व्यवसाय थाटल्याबद्दल काही हिंदू संघटनांनी जिल्हाधिकाऱ्यांकडे तक्रार केली होती. संबंधित व्यावसायिकाकडे आवश्यक परवाने नसल्याचे समोर आल्यानंतर ही कारवाई करण्यात आली. यामुळे यंदा जत्रेत लहान मुले आणि तरुणांना जायंट व्हील्ससह इतर मनोरंजनात्मक राईड्सचा आनंद लुटता येणार नाही.
बार्देश मामलेदार कार्यालयाच्या दोन पथकांनी गुरुवारी दुपारी जत्रेत उभारलेल्या एकूण १८ मनोरंजन संरचनांना सील ठोकले. यंदा जत्रेत प्रथमच दोन जायंट व्हीलसह अनेक मोठ्या राईड्सची व्यवस्था करण्यात आली होती. मात्र, बुधवारी ३१ डिसेंबर रोजी अतिरिक्त जिल्हाधिकारी पुंडलिक खोर्जुवेकर यांनी आदेश जारी करत, सुरक्षा परवाने नसलेल्या या राईड्स तात्काळ सील करून त्या हटवण्याचे निर्देश उपजिल्हाधिकारी वर्षा परब आणि मामलेदार अनंत मळीक यांना दिले होते. तत्पूर्वी, २६ डिसेंबर रोजी अतिरिक्त जिल्हाधिकाऱ्यांनी अग्निशमन सुरक्षा परवाना नसल्याने हे पाळणे बंद ठेवण्याचे निर्देश दिले होते. तरीही प्रशासकीय दुर्लक्षामुळे या ठिकाणी अधिक राईड्स उभारल्या गेल्या होत्या.
श्री देव बोडगेश्वर जत्रेत मनोरंजन राईड्सचा व्यवसाय हिंदू व्यावसायिकालाच देण्याची मागणी काही हिंदू संघटनांनी देवस्थान समितीकडे निवेदनाद्वारे केली होती. मात्र, देवस्थानकडे केवळ बिगर हिंदू व्यावसायिकाचा अर्ज आल्याने समितीने त्यास परवानगी दिली होती. त्यानंतर संबंधित व्यावसायिकाला म्हापसा पालिकेसह इतर यंत्रणांनी एनओसी दिली होती, मात्र 'अग्निशमन सुरक्षा दाखला' मिळाला नव्हता. अखेर परवान्यांची पूर्तता न झाल्याने प्रशासनाने कारवाईचा बडगा उगारला आहे.
