चार महिन्यांपासून रकमेच्या प्रतिक्षेत : त्वरित देण्याची मागणी; अन्यथा आंदोलनाचा इशारा
वाळपई : गोव्यातील (Goa) डिचोली (Bicholim) तालुक्यानंतर सत्तरी तालुक्यातील (Sattari Taluka) दूध उत्पादकांना गेल्या चार महिन्यांपासून दुधाची (Milk) आधारभूत रक्कम मिळालेली नाही. यामुळे दूध उत्पादकांना अडचणींना सामोरे जावे लागत आहे. त्वरित रक्कम न दिल्यास डिचोली व सत्तरी तालुक्यातील दूध उत्पादकांनी आंदोलन करण्याचा इशारा दिला आहे.
सत्तरी तालुक्यामध्ये मोठ्या प्रमाणात दुधाचे उत्पादन होत असते. अनेक दूध उत्पादक संस्थांच्या माध्यमातून दूध उत्पादकांना सरकारच्या योजनेअंतर्गत आधारभूत रक्कम मिळत असते. मात्र, गेल्या चार महिन्यांपासून दूध उत्पादकांना याचा लाभ झालेला नाही. अनेक वेळा बँकेमध्ये जाऊन या संदर्भातील चौकशी केली मात्र, अजून पर्यंत ही रक्कम खात्यावर जमा झालेली नाही. यामुळे दूध उत्पादकांनी तीव्र संताप व्यक्त केला आहे.
सत्तरी तालुक्यात जवळपास ६० पेक्षा जास्त दूध उत्पादक संस्था गोवा दूध उत्पादक संघाला दूध उत्पादन करून पुरवठा करीत असतात. शेकडो शेतकरी यामध्ये कार्यरत आहेत. कामधेनू योजनेअंतर्गत अनेकांनी दूध उत्पादन वाढवण्यासाठी महत्त्वाचे योगदान दिले आहे. सरकारच्या योजनेअंतर्गत दूध उत्पादकांना आधारभूत किंमत मिळत असते. गेल्या चार महिन्यांपासून ही रक्कम अजून पर्यंत मिळालेली नाही.
दूध उत्पादकांसमोर अनेक अडचणी
सध्या तरी दूध उत्पादकांची परिस्थिती अत्यंत गंभीर झालेली आहे. कारण गोव्यामध्ये हिरवा चारा मिळणे कठीण आहे. कर्नाटकातील घाट परिसरातून गोव्यामध्ये मोठ्या प्रमाणात हिरवा चारा येत होता. मात्र, गेल्या काही महिन्यांपासून तो पूर्णपणे बंद झालेला आहे. गोव्यामध्ये हा चारा उपलब्ध नाही. सरकारची हिरवा चारा निर्मितीची योजना आहे. मात्र, त्याला अजून पर्यंत यश मिळालेले नाही. गोव्यात हिरवा चारा मिळत नसल्याने दूध उत्पादकांना खाद्यासाठी जास्त खर्च करावा लागतो. दिवसेंदिवस कामगारांची रोजंदारी वाढत असल्याने; दूध व्यवस्थापनाचे गणित जुळत नसल्याचा उत्पादकांचा दावा आहे. त्यात आधारभूत रक्कम न मिळाल्याने अडचणीत भर पडत असल्याचे दूध उत्पादकांचे म्हणणे आहे.
