पोलिसांच्या कामगिरीचे कौतुक आठ दिवसांत लावला छडा
दरोडेखोरांना अटक केल्याची माहिती पीडित सागर नायक यांना देताना निरीक्षक शेरीफ जॅकीस.
प्रतिनिधी। गोवन वार्ता
वास्को : बायणातील दरोड्याचा अवघ्या आठ दिवसांत मुरगाव पोलिसांनी इतर पोलिसांच्या सहकार्याने छडा लावला. या दरोडाप्रकरणी पोलिसांनी मूळचे ओडिशाचे असेलेल्या सहा जणांना मुंबईतून अटक केली. त्यांच्याकडून चोरीचा काही ऐवज जप्त करण्यात आला आहे. अटक केलेल्यांमध्ये बायणा येथे भेळपुरी, पाणीपुरी, सामोसे विक्रीचा गाडा लावणाऱ्या मूळच्या ओडिशातील मुख्य सूत्रधाराचा समावेश असल्याचे समजते. काहींच्या मते मुख्य सूत्रधार सागर नायक यांच्याकडे काम करत होता. काही महिन्यांपूर्वी त्याने काम सोडले. पोलिसांनी अटक केलेल्यांमध्ये त्याचा समावेश आहे की नाही, हे स्पष्ट होऊ शकले नाही.
बायणातील ‘चामुंडा आर्केड’च्या सहाव्या मजल्यावर राहणारे सागर नायक यांच्या फ्लॅटवर सात-आठ जणांनी दरोडा घातला होता. त्यांनी सागर यांच्या डोक्यावर लोखंडी सळीने प्रहार केला होता. सागर यांची पत्नी हर्षा आणि मुलगी नक्षत्रा यांनाही मारहाण केली होती. त्यांचे हातापाय बांधून त्यांच्या तोंडात कापडाचा बोळा घालून दरोडेखोर सोने, चांदीचे दागिने व रोकड असा मोठा ऐवज घेऊन पळाले होते. नियोजनबद्धरीत्या अवघ्या ३०-४० मिनिटामध्ये फ्लॅट लूटून इमारतीच्या मागील बाजूने त्यांनी पळ काढला होता. हेल्मेट घातल्याने व मास्क बांधल्याने त्यांची ओळख पटणे कठीण झाले होते. पोलिसांनी लागलीच तपास सुरू केला होता.
सदर दरोड्याप्रकरणातील संशयितांच्या मुसक्या आवळण्याचे आव्हान पोलीस उपमहानिरीक्षक वर्षा वर्मा यांनी स्वीकारले होते. दरोडेखोरांनी एकही पुरावा राहणार नाही याची खबरदारी घेतली होती. अतिशय नियोजनबद्ध दरोडा घातल्याने ते संशयांच्या फेऱ्यात होते. इमारतीची खडान् खडा माहिती एखाद्या माहितीगारालाच असते. तिजोरीबद्दल विचारणा करणे, कारची चावी घेतल्यावर थेट त्याच कारसमोर जाणे, लोखंडी ग्रिल्स नसलेल्या किचनच्या खिडकीसमोर जाणे, या गोष्टी माहितीगारच करू शकतो, असा संशय पोलिसांना होता. पोलिसांनी सागर नायक यांच्या आजी माजी कामगारांवर, तसेच इतर काहीजणांवर लक्ष केंद्रित केले होते. काहींच्या मते पोलिसांनी मोबाईलचा डम्प डेटा मिळवून त्याद्वारे तपास केला. दरोडा घातल्यावर चोर मुंबईला कसे पळाले, हा प्रश्न आहे. ते एकत्रितपणे गेले की वेगवेगळे ? मुंबईला जाण्यासाठी त्यांनी रेल्वे, बस की आणखी कोणत्या मार्गाचा अवलंब केला. यासंबंधी त्यांना गोव्यात आणल्यावरच स्पष्ट माहिती मिळणार आहे.
आमदार आमोणकरांकडून पोलिसांचे अभिनंदन
पुरावा न ठेवता नियोजनबद्धतेने टाकलेल्या दरोड्याचा पोलिसांनी अवघ्या आठ दिवसांत छडा लावल्याबद्दल मुरगावचे आमदार संकल्प आमोणकर यांनी पोलीस निरीक्षक शेरीफ जॅकीस यांच्यासह इतर पोलिसांचे अभिनंदन केले. सदर प्रकरणातील संशयितांच्या मुसक्या अावळणे ही कौतुकास्पद कामगिरी आहे. पोलिसांच्या या कामगिरीचा मुरगाववासीयांना अभिमान आहे, असे आमोणकर यावेळी म्हणाले.
सागर नायक यांच्याकडून आनंद व्यक्त
पोलिसांच्या कर्तबगारीवर आपला पूर्ण विश्वास होता. सदर प्रकरणाचा छडा लागण्यास सहा-सात महिने लागतील, असे वाटत होते. काहीजण पोलिसांच्या तपासासंबंधी प्रश्न उपस्थित करत होते. मुरगाव पोलीस निरीक्षक शेरीफ जॅकीस, उपअधीक्षक गुरुदास कदम माझ्याशी संपर्क साधून होते. ते माझ्याकडे असलेल्या कामगारांची माहिती घेत होते. योग्य दिशेने तपास सुरू असल्याची मला खात्री होती. पोलिसांनी या प्रकरणाचा आठवडाभरातच छडा लावल्याबद्दल आनंद होत आहे. मुख्यमंत्री डॉ. प्रमोद सावंत, पोलीस महासंचालक, महानिरीक्षक, उपमहानिरीक्षक, दक्षिण गोवा अधीक्षक, वास्कोचे उपअधीक्षक, निरीक्षक व इतर पोलिसांचे आभार मानतो, असे पीडित सागर नायक यांनी सांगितले.
परिश्रम घेणाऱ्यांना यश मिळतेच : निरीक्षक जॅकीस
दराेडा प्रकरणाचा छडा लावण्यासाठी आम्ही खूप परिश्रम घेतले. परिश्रम घेणाऱ्यांना यश मिळतेच. दरोडेखोरांच्या शोधार्थ पोलीस पथके गोव्याबाहेर गेली होती. शेवटी ते दरोडेखोर हाती लागले. पोलिसांबद्दल काही लोक वाटेल ते बोलत होते. त्यांच्या बोलण्याकडे आम्ही लक्ष न देता सातत्याने काम केले. आम्ही या प्रकरणाची माहिती देत राहिलो असतो, तर दरोडेखोरांना तपासाची माहिती मिळाली असती, असे मुरगावचे पोलीस निरीक्षक शेरीफ जॅकीस यांनी स्पष्ट केले.
