पुढील सुनावणी येत्या सोमवारी
पणजी: गोव्यातील वीज खांबांवर लोंबकळणाऱ्या आणि धोकादायक ठरणाऱ्या केबल्समुळे झालेल्या अपघात आणि नुकसानीसाठी आता केबल ऑपरेटरच पूर्णपणे जबाबदार असतील, असे काशीनाथ शेट्ये म्हणाले. तसेच, आता एका खांबावर फक्त तीनच केबल्स घालण्याची परवानगी असेल. याप्रकरणी पुढील सुनावणी सोमवारी ठेवण्यात आली आहे.
या विषयावर झालेल्या सुनावणीदरम्यान, उच्च न्यायालयाने सर्व केबल ऑपरेटर्सना त्यांनी टाकलेल्या केबल्समुळे अपघात झाल्यास किंवा खांबाचे नुकसान झाल्यास, याची संपूर्ण जबाबदारी आणि दायित्व घेण्याची लेखी हमी देण्याचे आदेश दिले आहेत, अशी माहिती या प्रकरणाचा पाठपुरावा करणारे वीज खात्याचे कार्यकारी अभियंते काशीनाथ शेट्ये यांनी दिली.
सांताक्रुझमध्ये वीज खात्याची धडक मोहीम
दरम्यान, गोव्याच्या वीज खात्याने कार्यकारी अभियंता काशीनाथ शेट्ये यांच्या नेतृत्वाखाली सांताक्रुझ परिसरात मोठी कारवाई करत वीज खांबांवर अनधिकृतपणे लटकलेल्या इंटरनेट आणि केबल सेवा पुरवठादारांच्या केबल्स कापण्याची मोहीम तीव्र केली आहे.
या कारवाईला कारण ठरले ते म्हणजे, मागील बुधवारी येथेच एका वीजखांबावर लटकलेल्या केबलमुळे झालेला अपघात. या अपघातानंतर वीज खात्याने तातडीने कठोर पाऊल उचलले. गेली वर्षभर वीज खाते सेवा पुरवठादारांना धोकादायक केबल्स हटवण्यासाठी पाठपुरावा करत होते. मात्र, सेवा पुरवठादारांनी सहकार्य न केल्यामुळे अखेर वीज खात्यानेच आता केबल्स कापण्याचे काम हाती घेतले आहे, असे शेट्ये यांनी सांगितले.
थकबाकी आणि नियमांचे उल्लंघन
वीज खात्याच्या खांबांचा वापर करण्यासाठी पूर्वपरवानगी आणि शुल्क भरणे आवश्यक आहे. मात्र, या नियमांचे उल्लंघन झाल्याचे खात्याने नमूद केले आहे. विविध सेवा पुरवठादारांकडे असलेली दीर्घकाळची थकीत थकबाकी वसूल करणे आणि नागरिकांची सुरक्षा सुनिश्चित करणे, हा या कारवाईचा मुख्य उद्देश आहे. 'राईट-ऑफ-वे' शुल्कावरून सेवा पुरवठादार आणि वीज खात्यामध्ये गेल्या अनेक वर्षांपासून संघर्ष सुरू आहे.
थकीत भाडे, नागरिकांच्या सुरक्षेला धोका आणि नियमांचे उल्लंघन होत असल्याचा ठपका ठेवत, खात्याने ही कार्यवाही सुरू केली असून, ती पुढेही सुरूच राहील, असे कार्यकारी अभियंते शेट्ये यांनी स्पष्ट केले.
