पणजी : यंदा दहावीचा निकाल १०० टक्के देण्यात सरकारी शाळा अघाडीवर आहेत. येथे असणाऱ्या अत्याधुनिक सुविधा याचा विचार करून राज्यातील पालकांनी आपल्या मुलांना सरकारी शाळेतच शिकवावे असे आवाहन मुख्यमंत्री डॉक्टर प्रमोद सावंत यांनी केले. गुरुवारी मंत्रालयात झालेल्या पत्रकार परिषदेत ते बोलत होते. यावेळी शिक्षण खात्याचे सचिव प्रसाद लोलयेकर, संचालक शैलेश झिंगडे , मेघना शेटगावकर , शंभू घाडी, सिंधू प्रभुदेसाई , पॉल फर्नांडिस व अन्य अधिकारी उपस्थित होते.
मुख्यमंत्र्यांनी सांगितले की , यंदा दहावीच्या परीक्षेत ७८ पैकी ४१ सरकारी शाळांचा निकाल शंभर टक्के लागला आहे. यासाठी मी सर्व विद्यार्थी तसेच शिक्षकांचे अभिनंदन करतो. एक शिक्षण मंत्री म्हणून ही नक्कीच अभिमानास्पद बाब आहे. गेल्या काही वर्षात सरकारी शाळांमध्ये चांगल्या दर्जाच्या मूलभूत सुविधा उपलब्ध करून देण्यात आल्या आहेत. याशिवाय अत्याधुनिक तांत्रिक सुविधा देण्याचाही आमचा प्रयत्न आहे.
ते म्हणाले, सरकारी शाळेतील बहुतेक विद्यार्थी हे मध्यम वर्गातील असतात. अनेकदा त्यांना एकच पालक असतात. सरकारी शाळेतील विद्यार्थी अन्य खासगी शिकवण्या लावत नाहीत. काही अनुदानित शाळा मुलांना नववीत अनुत्तीर्ण करतात. त्यांना नववीत दोन वेळा बसायला लावतात. असे अनुदानित शाळातून अनुत्तीर्ण झालेले विद्यार्थी सरकारी शाळेत प्रवेश घेतात.सरकारी शिक्षकांना अधिक प्रशिक्षण देणार
लोलयेकर यांनी सांगितले की, केवळ गोव्यतील नव्हे तर संपूर्ण देशातील पालक त्यांच्या मुलांसाठी खाजगी किंवा अनुदानित शाळेला प्राधान्य देतात. त्याचा विचार करून आम्ही गेल्या काही वर्षापासून सरकारी शाळांचे इन्फ्रास्ट्रक्चर सुधारत आहोत. शाळेतील शिक्षकांचा विकास व्हावा यासाठी वेगवेगळ्या प्रकारचे प्रशिक्षण देण्यात येते. यापुढेही त्यांना देशातील नामांकित शिक्षण संस्थांकडून प्रशिक्षण देण्यात येणार आहे.
झिंगडे यांनी सांगितले की , राज्यातील १३ सरकारी शाळांत प्रत्येकी एका विद्यार्थ्याला एटीकेटी मिळाल्याने या शाळांचा शंभर टक्के निकाल लागला नाही. कदाचित पुढील परीक्षेत ते उत्तीर्ण होऊ शकतात. यामुळे १०० टक्के निकाल देणाऱ्या सरकारी शाळांचे प्रमाण वाढू शकते.
