गंगोत्री आणि यमुनोत्री धामांना भेट देणाऱ्या भाविकांच्या संख्येने यात्रेच्या सुरुवातीच्या पहिल्या सहा दिवसांत मागील वर्षांचे सर्व विक्रम मोडले असून चार धाम यात्रेसाठी नागरिकांची गर्दी वाढत आहे.
डेहराडून: चारधाम यात्रा मार्गावर विविध ठिकाणी चेक पोस्टवर यात्रेकरूंना रोखण्यात येत आहे. यामुळे भविकांत प्रशासनाबाबत चीढ निर्माण झाली आहे. यात्रेतील गैरव्यवस्थापनाच्या विरोधात बुधवारी उत्तरकाशीमध्ये हॉटेल आणि इतर व्यावसायिकांनी मिरवणूक काढून निषेध केला. यमुना व्हॅली हॉटेल असोसिएशनच्या बॅनरखाली पालीगड येथील राष्ट्रीय महामार्गावर हॉटेल व इतर व्यावसायिकांनी मिरवणूक काढून उत्तराखंड सरकारच्या विरोधात घोषणाबाजी केली. पालीगडावर थांबलेल्या यात्रेकरूंनीही या मिरवणुकीत सामील होऊन व्यावसायिकांसह निषेध व्यक्त केला. हॉटेल असोसिएशनचे अध्यक्ष सोबन सिंग राणा यांनी सांगितले की, यमुनोत्री धाम यात्रा सुरू होऊन ६ दिवस झाले आहेत, मात्र यात्रा मार्गावर अजूनही गोंधळ सुरू आहे.
राणा यांनी दावा केला, 'यमुनोत्री मार्गावर अनेक ठिकाणी प्रवाशांना १०-१२ तास ट्रेनमध्ये कोणतेही कर्ण न देता थांबवून ठेवले जाते. प्रदीर्घ प्रतीक्षेनंतर त्यांना वाहतूक कोंडीचे कारण देत पुढे जाण्यास परवानगी नाकारली जात आहे. त्यामुळे यात्रेकरूंचे पुढील वेळापत्रक बिघडत असून त्यामुळे अनेक भाविक यमुनोत्री धामचे दर्शन न घेताच परतत आहेत. मुख्यमंत्री पुष्करसिंग धामी यांनी याबाबत तातडीने कार्यवाही करावी, जेणेकरून भाविकांना त्यांचा प्रवास सहज करता येईल, असे राणा म्हणाले.
या वेळी गंगोत्री आणि यमुनोत्री धामांना भेट देणाऱ्या भाविकांच्या संख्येने यात्रेच्या सुरुवातीच्या पहिल्या ६ दिवसात मागील वर्षांचे सर्व रेकॉर्ड मोडले आहेत. अधिकृत आकडेवारीनुसार, मंगळवारी १५,६३० यात्रेकरूंनी यमुनोत्रीला भेट दिली तर गंगोत्री धाममध्ये ११ मे रोजी एकाच दिवसात सर्वाधिक १८९७३ यात्रेकरूंनी दर्शन घेतले. दोन्ही ठिकाणी भेट देणाऱ्या भाविकांची अभूतपूर्व संख्या पाहता मुख्यमंत्र्यांनी त्यांचे सचिव आर. मीनाक्षी सुंदरम यांना उत्तरकाशी येथे तळ ठोकून गंगोत्री आणि यमुनोत्री येथील प्रवास व्यवस्थेवर सतत लक्ष ठेवण्यास सांगितले आहे.
यात्रा मार्गावर नोंदणीविना धावणाऱ्या बसेस व अन्य वाहनांच्या मुद्द्यावर 'टूर ऑपरेटर्स'सोबत बैठक घेण्याचे निर्देश मुख्य सचिव राधा रतुरी यांनी परिवहन विभागाला दिले. चारधाम महापंचायतीचे सदस्य ब्रिजेश सती म्हणाले की, मोठ्या संख्येने धाममध्ये येणाऱ्या लोकांमध्ये भाविक तसेच यूट्यूबर्स आणि ब्लॉगर्स यांचा समावेश आहे, त्यांच्यासाठी मंदिरांमध्ये पूजा करणे महत्त्वाचे नाही. ते फक्त शूटिंग करण्यासाठी येतात. अलीकडे, यमुनोत्रीला भाविकांची संख्या वाढल्याने, रविवारी भाविकांना आपला प्रवास एक दिवस पुढे ढकलण्याची विनंती पोलिसांना करावी लागली.
दुसरीकडे गढवालचे आयुक्त विनय शंकर पांडे यांनी एवढ्या मोठ्या संख्येने भाविकांचे आगमन हे उत्तराखंडचे सौभाग्य असल्याचे म्हटले आहे परंतु यासोबतच काही आव्हानेही आहेत आणि त्यांना तोंड देण्यासाठी सर्वतोपरी प्रयत्न केले जात आहेत. ते म्हणाले की, १५ एप्रिल ते १४ मे पर्यंत ४ धामांमध्ये २६,७३,५१९ भाविकांनी नोंदणी ऑनलाइन पद्धतीने केली आहे, तर हरिद्वार आणि ऋषिकेशमध्ये ८ मे पासून सुरू झालेल्या ऑफलाइन काउंटरद्वारे १,४२,६१४ भाविकांनी नोंदणी केली आहे. मात्र, मुख्य सचिवांच्या अध्यक्षतेखाली सकाळी झालेल्या बैठकीत अनेक भाविक नोंदणी करताना दिलेल्या तारखेपूर्वीच चार धाम यात्रेला पोहोचल्याचेही निदर्शनास आल्याचे पांडे यांनी सांगितले, त्यामुळे धाममध्ये भाविकांची संख्या वाढली आहे.
पांडे म्हणाले की, गेल्या वर्षी यमुनोत्री धामच्या उद्घाटनाच्या दिवशी ६,८३८ भाविक आले होते, परंतु यावेळी ही संख्या दुप्पट होऊन १२,१९३ झाली आहे. त्याचप्रमाणे, गेल्या वर्षी दरवाजे उघडण्याच्या वेळी १८,३३५ भाविक केदारनाथला आले होते, यावर्षी हीच संख्या २९,००० पर्यंत वाढली आहे. चारधाम यात्रा सुरू झाल्याच्या पहिल्या सहा दिवसांत ११ भाविकांचा मृत्यू झाल्याच्या प्रश्नाला उत्तर देताना पांडे म्हणाले की, राज्य सरकारने विविध ठिकाणी भाविकांच्या आरोग्य तपासणीसाठी पुरेशी व्यवस्था केली आहे. आत्तापर्यंत ५९,१५८ भाविकांनी यमुनोत्री, ५१,३७८ गंगोत्री, १,२६,३०६ केदारनाथ आणि ३९,५७४ भाविकांनी बद्रीनाथ धामला भेट दिली आहे.
