नायरोबी : केनियाचे लष्करप्रमुख फ्रान्सिस ओमोंडी ओगोला (६१) यांचा हेलिकॉप्टर अपघातात काल गुरुवारी मृत्यू झाला. त्यांच्यासोबत आणखी ९ जणांचाही मृत्यू झाला आहे. यामुळे केनिया सरकारने आजपासून पुढील तीन दिवस राष्ट्रीय दुखवटा जाहीर केला आहे.
जनरल फ्रान्सिस ओगोला आणि लष्कराच्या इतर नऊ सदस्यांचा हेलिकॉप्टर अपघातात मृत्यू झाला. तर, अपघातातून दोघे बचावले. कमांडर-इन-चीफ आणि संपूर्ण केनिया संरक्षण दल या नात्याने माझ्यासाठी ही दुःखाची वेळ आहे. आजचा दिवस देशासाठी सर्वात दुर्दैवी आहे. आम्ही आमचे सर्वात धाडसी सेनापती गमावले, असे केनियाचे राष्ट्राध्यक्ष विल्यम रुटो यांनी म्हटले आहे.
लष्करी प्रमुख ओगोला यांनी दुपारी नैरोबी सोडले आणि देशाच्या नॉर्दर्न रिफ्ट प्रदेशातील सैनिकांना भेटले आणि शाळेच्या नूतनीकरणाच्या कामाची पाहणी केली. हेलिकॉप्टर उड्डाणानंतर काही वेळातच कोसळले. हेलिकॉप्टर अपघातात मृत्युमुखी पडलेल्यांचे मृतदेह गुरुवारी रात्री उशिरा नैरोबी येथे आणण्यात आले. अपघाताचे कारण शोधण्यासाठी तपास अधिकाऱ्यांचे पथक घटनास्थळी रवाना झाले आहे.
सैन्य प्रमुख फ्रान्सिस ओगोला कोण होते?
राज्य प्रसारक केनिया ब्रॉडकास्टिंग कॉर्पोरेशन (KBC) च्या मते, ६१ वर्षीय ओगोला हे सेवेत मरण पावणारे देशातील पहिले लष्करी प्रमुख आहेत. १९८४ मध्ये ते केनिया संरक्षण दलात सामील झाले. केनिया हवाई दलात नियुक्त होण्यापूर्वी ओगोला १९८५ मध्ये दुसरे लेफ्टनंट बनले. अध्यक्ष विल्यम रुटो यांनी २०२३ मध्ये ओमोंडी ओगोला यांना जनरल पदावर पदोन्नती दिली होती. ओगोला यांची संरक्षण दलाचे प्रमुख म्हणून नियुक्ती करण्यात आली. याआधी ते संरक्षण दलाचे उपप्रमुख पद सांभाळत होते.
