लखनौ : उत्तर प्रदेशातील बिजनौर शहराजवळील एका शांत गावात घडलेल्या एका अत्यंत खळबळजनक आणि धक्कादायक घटनेने संपूर्ण परिसर हादरून गेला आहे. सुमारे दोन वर्षे गावात भाड्याने राहणाऱ्या एका महिलेशी जवळचे संबंध आल्यानंतर दोन चुलत भावांचा एचआयव्ही संसर्गामुळे दुर्दैवी अंत झाला आहे. अवघ्या तीन दिवसांच्या अंतराने एकाच घरातील दोन पुरुषांचा अशा प्रकारे मृत्यू झाल्याने गावात प्रचंड घबराट, शोक आणि संशयाचे दाट सावट निर्माण झाले आहे.
मिळालेल्या सविस्तर माहितीनुसार, संबंधित महिला गावात सुमारे दोन वर्षे भाड्याने राहत होती. काही दिवसांपूर्वी ही महिला अचानक घर सोडून निघून गेली. तिच्या जाण्यानंतर लगेचच ५१ वर्षीय मोठ्या भावाची प्रकृती अचानक कमालीची खालावली. सुरुवातीला कुटुंबीयांनी स्थानिक पातळीवर त्याच्यावर प्राथमिक उपचार केले; मात्र प्रकृतीत कोणताही सुधारणा न झाल्याने त्याला तातडीने उत्तराखंड येथील ऋषिकेश एम्स रुग्णालयात दाखल करण्यात आले. तेथे वैद्यकीय तपासणी केली असता त्याला एचआयव्ही संसर्ग झाल्याचे स्पष्ट झाले. डॉक्टरांनी तातडीने उपचार सुरू केले तरीही श्वासोच्छवासाचा अत्यंत गंभीर त्रास उद्भवल्याने ऑक्सिजनवर असतानाच त्याची प्राणज्योत मालवली. या दुःखातून कुटुंब सावरत नाही तोच, त्याच्या ४३ वर्षीय चुलत भावाचीही प्रकृती वेगाने खालावली आणि उपचारादरम्यान बुधवारी रात्री त्याचाही मृत्यू झाला. वैद्यकीय तपासणीत त्यालाही या गंभीर आजाराची लागण झाल्याचे निष्पन्न झाले होते.
या दुहेरी मृत्यूनंतर गावात प्रचंड भीतीचे वातावरण तयार झाले आहे. संबंधित महिला राहत असलेल्या घरात इतरही अनेक लोकांचे येणे-जाणे होते. त्यामुळे त्या महिलेशी संपर्क आलेल्या इतर व्यक्तींमध्ये आपल्यालाही संसर्ग झाला असावा का, या शंकेने तीव्र चिंतेची लाट पसरली आहे. घटनेचे गांभीर्य लक्षात घेऊन बिजनौरचे मुख्य वैद्यकीय अधिकारी डॉ. कौशलेंद्र सिंह यांनी गावात आरोग्य विभागाचे एक विशेष पथक तातडीने पाठवण्याचा निर्णय घेतला आहे. हे पथक ग्रामस्थांमध्ये जाऊन एचआयव्ही संसर्गाबाबत असलेले गैरसमज आणि भीती दूर करण्याचे कार्य करत आहे. तसेच ज्या नागरिकांना संसर्गाची शंका वाटत असेल, त्यांना शासकीय आरोग्य केंद्रात जाऊन पूर्णपणे गोपनीय पद्धतीने मोफत तपासणी करून घेण्यासाठी प्रोत्साहित केले जात आहे.
वैद्यकीय तज्ज्ञांच्या मते, केवळ सहवास किंवा साध्या स्पर्शाने एचआयव्हीचा प्रसार होत नाही. समाजमाध्यमांवरील किंवा अनधिकृत अफवांवर विश्वास न ठेवता नागरिकांनी वैज्ञानिक आणि वैद्यकीय दृष्टिकोन बाळगणे गरजेचे आहे. संसर्गाची शंका आल्यास घाबरून न जाता त्वरित चाचणी करून घेणे हाच सर्वात सुरक्षित मार्ग आहे. सुरुवातीच्या टप्प्यातच रोगाचे निदान झाल्यास 'अँटिरिट्रोव्हायरल थेरपी' म्हणजेच एआरटी उपचाराच्या साहाय्याने या विषाणूवर प्रभावी नियंत्रण मिळवता येते आणि रुग्ण सामान्य आयुष्य जगू शकतो. त्यामुळे बाधितांशी सामाजिक भेदभाव न करता त्यांना वैद्यकीय व मानसिक आधार देणे आवश्यक असल्याचे आरोग्य विभागाने स्पष्ट केले आहे.