सुरक्षिततेसाठी उपजिल्हाधिकाऱ्यांचे कडक आदेश
डिचोली: गोव्यातील प्रसिद्ध आणि लाखो भाविकांचे श्रद्धास्थान असलेल्या शिरगाव येथील श्री देवी लईराईचा वार्षिक जत्रोत्सव यंदा २१ एप्रिल २०२६ पासून सुरू होत आहे. या उत्सवासाठी होणारी भाविकांची अलोट गर्दी आणि सुरक्षेची गरज लक्षात घेऊन, डिचोलीचे उपजिल्हाधिकारी तथा उपविभागीय दंडाधिकारी शुभम नाईक यांनी एक महत्त्वपूर्ण आदेश जारी केला आहे. जत्रोत्सवाच्या काळात सार्वजनिक ठिकाणी सुरक्षा नियमांची कडक अंमलबजावणी करण्यासाठी आणि कोणताही अघटित प्रकार टाळण्यासाठी विशेष 'संयुक्त कृती दल' (Joint Task Force) स्थापन करण्यात आले आहे.
भारतीय नागरिक सुरक्षा संहिता २०२३ च्या कलम १५२ अंतर्गत हा आदेश काढण्यात आला आहे. या कृती दलाच्या प्रमुखपदी डिचोलीचे मामलेदार असतील, तर त्यांच्या मार्गदर्शनाखाली पोलीस निरीक्षक, अग्निशमन अधिकारी, वीज खात्याचे कार्यकारी अभियंता, सार्वजनिक बांधकाम खात्याच्या रस्ते आणि इमारत विभागाचे कार्यकारी अभियंता तसेच शिरगाव पंचायतीचे सचिव यांचा या दलात समावेश करण्यात आला आहे. जत्रोत्सवाच्या नियोजनात गर्दीचे नियंत्रण, अनधिकृत बांधकामे हटवणे आणि आपत्कालीन मार्ग मोकळे ठेवणे ही या दलाची मुख्य जबाबदारी असेल.
गोवास्थित मुंबई उच्च न्यायालयाने यापूर्वी एका याचिकेवर सुनावणी करताना जत्रोत्सवातील गर्दीचे नियोजन आणि प्रतिबंधात्मक उपायांवर भर दिला होता. त्या पार्श्वभूमीवर प्रशासनाने यंदा अधिक खबरदारी घेतली आहे. नवीन नियमांनुसार, सक्षम प्राधिकरणाच्या लेखी परवानगीशिवाय रस्त्यावर, पदपथावर किंवा कोणत्याही सार्वजनिक जागेवर स्टॉल, शेड किंवा तात्पुरती बांधकामे उभी करण्यास सक्त मनाई करण्यात आली आहे. तसेच, आपत्कालीन वाहनांच्या मार्गात अडथळा निर्माण होईल अशा पद्धतीने कोणतेही साहित्य किंवा वाहने उभी केल्यास त्यावर तातडीने कारवाई करण्याचे निर्देश देण्यात आले आहेत.
सार्वजनिक ठिकाणी असणारी विद्युत उपकरणे, अग्निशमन यंत्रणा आणि संरचनात्मक मांडणी सुरक्षा मानकांनुसार असणे अनिवार्य आहे. जर या यंत्रणा असुरक्षित आढळल्यास कृती दलाला त्या काढून टाकण्याचे पूर्ण अधिकार देण्यात आले आहेत. वाहतुकीचे नियमन करण्यासाठी पोलीस आणि वाहतूक विभागाने निश्चित केलेल्या जागीच पार्किंग करणे बंधनकारक असेल. सार्वजनिक बांधकाम खाते या कृती दलाला आवश्यक यंत्रसामग्री, मजूर आणि तांत्रिक सहकार्य पुरवणार आहे. या आदेशाचे उल्लंघन करणाऱ्या व्यक्तींवर कायदेशीर कारवाई करण्यात येईल, असा इशाराही प्रशासनाने दिला आहे. हा आदेश जत्रोत्सव पूर्ण होईपर्यंत किंवा पुढील आदेश येईपर्यंत अंमलात राहणार आहे.
