गंजलेल्या लोखंडी पुलाच्या दुरुस्तीसाठी रिवण ग्रामस्थांची ग्रामसभेत आक्रमक भूमिका

रिवण येथील आडे लोखंडी पुलाची अधिकृत नोंद नसल्याचे पंचाने सांगितल्याने ग्रामसभेत गदारोळ झाला; गंजलेल्या पुलाची तातडीने दुरुस्ती करून संभाव्य दुर्घटना टाळण्याची मागणी ग्रामस्थांनी केली आहे.

Story: गोवन वार्ता | प्रतिनिधी |
14 mins ago
गंजलेल्या लोखंडी पुलाच्या दुरुस्तीसाठी रिवण ग्रामस्थांची ग्रामसभेत आक्रमक भूमिका

रिवण : रिवण येथील आडे भागातील लोखंडी पुलाची कोणतीही अधिकृत नोंद उपलब्ध नसल्याचे वक्तव्य एका स्थानिक पंचाने केल्याने रिवण ग्रामसभेत मोठा गदारोळ उडाला. ग्रामसभेदरम्यान या मुद्द्यावरून नागरिक आणि पंच सदस्यांमध्ये जोरदार शाब्दिक चकमक पाहायला मिळाली. गेल्या अनेक महिन्यांपासून या पुलाच्या दुरवस्थेबाबत स्थानिक रहिवासी प्रशासनाचे लक्ष वेधून घेत असताना, चक्क पुलाची अधिकृत नोंदच नसल्याचा दावा करण्यात आल्याने ग्रामस्थांनी तीव्र संताप व्यक्त केला आहे.

स्थानिक नागरिकांनी दिलेल्या माहितीनुसार, आडे  येथील या लोखंडी पुलाची अवस्था अत्यंत जीर्ण झाली आहे. पुलाच्या लोखंडी सांगाड्याला मोठ्या प्रमाणात गंज चढला असून, संभाव्य दुर्घटना टाळण्यासाठी या पुलाची तातडीने दुरुस्ती आणि देखभाल करणे गरजेचे आहे. यासंदर्भात ग्रामस्थांनी यापूर्वीही अनेकदा तक्रारी करून संबंधित अधिकाऱ्यांच्या निदर्शनास ही बाब आणून दिली होती. मात्र, प्रत्यक्ष वापरात असलेल्या आणि नागरिकांच्या दैनंदिन प्रवासासाठी महत्त्वाच्या असलेल्या पुलाची सरकारी दप्तरी नोंदच कशी नाही, असा संतप्त सवाल ग्रामस्थांनी ग्रामसभेत उपस्थित केला.

प्रशासनाच्या या उदासीन भूमिकेवर ग्रामस्थांनी तीव्र नाराजी व्यक्त केली आहे. पुलाच्या सुरक्षिततेबाबत वारंवार आवाज उठवूनही अद्याप कोणतीही ठोस पावले उचलली गेली नसल्याचे नागरिकांनी निदर्शनास आणून दिले. या पुलावरून दररोज अनेक वाहनचालक आणि पादचारी प्रवास करत असतात. त्यामुळे मोठा अपघात घडण्यापूर्वी आणि प्रवाशांच्या जीवितास अधिक धोका निर्माण होण्यापूर्वी संबंधित यंत्रणांनी या प्रकरणात तातडीने हस्तक्षेप करून पुलाच्या दुरुस्तीचे काम हाती घ्यावे, अशी जोरदार मागणी ग्रामस्थांनी केली आहे.


हेही वाचा
सर्व पहा