यंदा चित्रपट महोत्सवाचे उद्घाटन होणार चित्ररथ मिरवणुकीने

पणजी : गोव्यातील (Goa) पणजीत (Panjim) होणाऱ्या ५६ व्या आंतरराष्ट्रीय चित्रपट महोत्सवाचे (IFFI) उद्घाटन वेगळ्या पद्धतीने होणार आहे. शिगमा व कार्निवलची (Shigmo and Carnival) झलक प्रदर्शित करण्याच्या हेतूने जुने सचिवालय ते मनोरंजन संस्थेच्या इमारतीपर्यंत चित्ररथ मिरवणूक होईल. यानंतर मनोरंजन संस्था इमारतीबाहेरच्या स्टेजवर औपचारीक उद्घाटनाचा कार्यक्रम होणार असल्याचे मुख्यमंत्री (Chief Minister) डॉ. प्रमोद सावंत (Dr. Pramod Sawant) यांनी सांगितले.

मुख्यमंत्री डॉ. प्रमोद सावंत यांनी पर्वरी मंत्रालयात पत्रकार परिषद घेतली. फिडे बुद्धीबळ स्पर्धेमुळे ताळगाव येथील डॉ. श्यामाप्रसाद मुखर्जी स्टेडियम उपलब्ध नसल्याचा समज चुकीचा आहे. समारोप सोहळा पूर्वीप्रमाणे डॉ. श्यामाप्रसाद मुखर्जी स्टेडियमवर होणार आहे. तसेच उद्घाटन होणार नसल्याचे फिरत असलेले संदेश सुद्धा चुकीचे आहेत.

नेहमीपेक्षा वेगळ्या पद्धतीने उद्घाटन व्हावे, अशी सूचना आयोजकांकडून झाली होती. शिगमा व कार्निवल ही गोव्याची संस्कृती आहे. तीचे दर्शन चित्रपट जगताला व्हावे, यासाठी यंदा चित्ररथ मिरवणुकीने महोत्सवाचे उद्घाटन होणार असल्याचे मुख्यमंत्री डॉ. प्रमोद सावंत म्हणाले. 

कोळशाचे प्रमाण वाढलेले नाही

राज्यात कोळसा हाताळणीचे प्रमाण वाढलेले नाही. राज्य सरकार तसेच केंद्राने कोळसा हाताळणीबाबत कोणतीही अधिसूचना जारी केलेली नाही. कोळशाचे प्रमाण १ टनाने सुद्धा वाढणार नाही. मडगावची सभा कोळशावर होती की आणखी कशासाठी? ते मला माहिती नाही, अशी प्रतिक्रीया मुख्यमंत्री डॉ. प्रमोद सावंत यानी कोळशाच्या विरोधात मडगावात झालेल्या सभेवर व्यक्त केली आहे.

नोकरी घोटाळा : फोंड्यातील घटनेच्या तपासासाठी नव्याने एफआयआर

नोकरीसाठी पैसे देण्याचा प्रकार जो फोंड्यात घडला होता, त्याची नव्याने एफआयआर नोंद करून चौकशी होणार आहे. आणखी नवीन नावे आली तर त्यांचीही चौकशी होईल. वीजमंत्री सुदिन ढवळीकर यानी योग्य प्रकारे चौकशी झाली नसल्याचे माझ्या कानावर घातले आहे, असे मुख्यमंत्री म्हणाले.

पूजा नाईकवर विश्वास ठेवता येत नाही : सुदिन ढवळीकर

नोकरी घोटाळ्यातील संशयित पूजा नाईक ही स्वत:ची सूटका करण्यासाठी नव्याने आरोप करण्याची शक्यता आहे. त‌‌िच्यावर माझा विश्वास नाही. तरीही आरोपांची चौकशी गुन्हा शाखेने करायला हवी. गुन्हा शाखा चौकशी करीत आहे. नोकरीसाठी पैसे देण्याचा जो प्रकार फोंड्यात घडला होता, त्याची पोलिसांनी योग्य प्रकारे चौकशी केलेली नाही, असे वीजमंत्री सुदिन ढवळीकर यानी म्हटले आहे.