बेतूल येथील प्रस्तावित बंदराला पंचायतीचा तीव्र विरोध

मडगाव: बेतूल येथील प्रस्तावित बंदर प्रकल्पामुळे पर्यावरणाची हानी होणार असून, स्थानिकांच्या उदरनिर्वाहाच्या साधनांवर गदा येणार आहे. त्यामुळे या प्रकल्पाला स्थानिक नागरिक आणि पंचायतीचा तीव्र विरोध आहे. या प्रकल्पाबाबत सरकारने आपल्याला विश्वासात घेतलेले नसल्यामुळे हा प्रकल्प कोणत्याही परिस्थितीत होऊ देणार नाही, असा स्पष्ट इशारा केपेचे आमदार एल्टन डिकॉस्टा यांनी दिला. यावेळी पत्रकार परिषदेला आमदार एल्टन डिकॉस्टा यांच्यासह नाकेरी बेतूलचे सरपंच प्रीतम देउलकर, उपसरपंच दामास्को डिसिल्वा, पंच जॉली सिमोईस आणि साल्वासो फर्नांडिस उपस्थित होते.

आमदारांचा आक्षेप

आमदार डिकॉस्टा यांनी सांगितले की, सागरमाला योजनेंतर्गत होणाऱ्या या बंदराला याआधीच्या आमदारांनी विरोध दर्शवला असता, तर हा प्रकल्प पुन्हा आला नसता. या प्रकल्पाबद्दल पंचायतीला किंवा आमदार म्हणून आपल्याला कोणतीही माहिती देण्यात आलेली नाही. प्रशासनाकडूनही याबाबत कोणतीही माहिती उपलब्ध नसल्याचे सांगण्यात आले.

प्रकल्प राबवताना लोकांना विश्वासात घेणे आवश्यक आहे. लोकांना नको असलेले प्रकल्प त्यांच्यावर लादू नयेत, असे डिकॉस्टा म्हणाले. या प्रकल्पाचा फटका केपेसह वेळ्ळी, बाणावलीतील मच्छीमारांनाही बसणार आहे. पंच सदस्यांसह लवकरच मुख्यमंत्र्यांची भेट घेऊन लोकांच्या भावना त्यांच्यासमोर मांडल्या जातील. मच्छीमारांचा व्यवसाय, पर्यटन आणि पर्यावरणाची हानी करणारा हा बंदर प्रकल्प काहीही झाले तरी होऊ देणार नाही. सरकारने बेतूल येथील छत्रपती शिवरायांच्या किल्ल्याला पुनर्वैभव प्राप्त करून द्यावे आणि लोकांना नको असलेले प्रकल्प आणू नयेत, असेही त्यांनी सांगितले.

पंचायतीची बाजू

उपसरपंच दामास्को डिसिल्वा यांनी सांगितले की, नाकेरी बेतूल पंचायत क्षेत्रात बेतूल येथे एमपीए (MPA) कडून बंदराची उभारणी करण्याचा प्रकल्प प्रस्तावित आहे. या प्रकल्पाला २०१७ मध्येही स्थानिकांनी विरोध दर्शवला होता. या बंदराची उभारणी झाल्यास स्थानिक मच्छीमारांचे उदरनिर्वाहाचे साधन नष्ट होईल. ज्या ठिकाणी प्रकल्प प्रस्तावित आहे, ते ठिकाण मासळीच्या निर्मितीसाठी अत्यंत महत्त्वाचे आहे. प्रकल्पावेळी लोकांना विस्थापित करण्यात आल्यास त्यांच्या उदरनिर्वाहाचे साधन हिरावले जाईल आणि गावातील पर्यावरणाचे मोठे नुकसान होईल. ह्युज प्रेसिझनच्या कारखान्यात झालेल्या स्फोटामुळे बेतूल गावातील पर्यावरणाची हानी याआधीच झालेली आहे. बंदर आल्यास आणखी पर्यावरणाला हानी होईल.

डिसिल्वा यांनी आठवण करून दिली की, याआधी केंद्रीय मंत्री नितीन गडकरी यांनी हा प्रकल्प महाराष्ट्रात नेत असल्याचे सांगितले होते, पण आता पुन्हा या प्रकल्पाची चाहूल लागली आहे. वास्को आणि मुरगावमध्ये जसे झाले, तसे या ठिकाणी होईल. यापूर्वी या बंदरावर सिमेंट, तेल, कोळसा, लोह, बॉक्साईट यांची हाताळणी करण्यात येणार होती आणि दोन ब्लॉक नौदलासाठी देण्याचा विचार होता. तेलासाठी साठवणूक टाक्या कराव्या लागणार होत्या, त्यासाठी आणखी जागा उपलब्ध करावी लागणार होती. सध्या बेतूल येथे नवे विद्यापीठ झाले आहे आणि ओएनजीसीचा  एनर्जी विक हा कार्यक्रम दरवर्षी होणार आहे. अशा परिस्थितीत पर्यावरणाला  हानी पोहोचवणारा अजून एक प्रकल्प आणून लोकांना रस्त्यावर येण्याची वेळ आणू नये, असे मत दामास्को डिसिल्वा यांनी व्यक्त केले.