चिंबलमध्ये युनिटी मॉलविरोधात रणकंदन
पणजी: निसर्गरम्य चिंबलच्या जमिनीवर 'युनिटी मॉल' उभारण्याच्या सरकारी हालचालींनी गावागावात संतापाचा वणवा पेटवला आहे. गेल्या २२ दिवसांपासून कदंब पठारावर सुरू असलेल्या या अटीतटीच्या लढाईने आता एका निर्णायक वळणावर येऊन ठेपली आहे. तोपर्यंत आम्ही हटणार नाही! असा जणू वज्रनिर्धारच ग्रामस्थांनी केला असून आता सर्वांच्या नजरा सरकारच्या त्या एका निर्णयाकडे लागल्या आहेत, जो सोमवारी किंवा मंगळवारी जाहीर होणार आहे. जर हा निर्णय जनभावनेच्या विरोधात गेला, तर चिंबलमध्ये संघर्षाचा मोठा भडका उडण्याची चिन्हे आहेत.
या आंदोलनाची व्याप्ती आता केवळ एका गावापुरती मर्यादित राहिलेली नाही. 'गाकुवेध' (GAKUVED) या संघटनेने आंदोलकांना पाठिंबा दिला आहे. ज्ञानेश्वर पिळगावकर आणि रामकृष्ण जल्मी यांच्यासारख्या कार्यकर्त्यांनी आंदोलकांची भेट घेऊन या लढाईत उडी घेतल्याने आंदोलनाला एक नवी धार प्राप्त झाली आहे. चिंबल जैवविविधता मंडळाचे अध्यक्ष गोविंद शिरोडकर यांनी स्पष्ट इशारा दिला आहे की, सरकारने दिलेल्या आश्वासनानुसार जर सोमवारपर्यंत प्रकल्पाबाबत ठोस निर्णय झाला नाही, तर आंदोलनाचे स्वरूप अधिक रौद्र आणि आक्रमक होईल.
गुरुवारी रात्री उशिरा मेरशी जंक्शनवर आंदोलक आणि मुख्यमंत्री डॉ. प्रमोद सावंत यांच्यात झालेली नाट्यमय भेट ही या प्रकरणातील सर्वात मोठी 'ट्विस्ट' ठरली. युनिटी मॉल हा केंद्राचा प्रकल्प असल्याचे सांगत मुख्यमंत्र्यांनी आंदोलकांची समजूत काढण्याचा प्रयत्न केला असला, तरी ग्रामस्थ मात्र आपल्या भूमीच्या रक्षणासाठी मागे हटायला तयार नाहीत. गोवा वाचवण्यासाठी आज पुन्हा एकदा कुणीतरी 'गांधी' होण्याची गरज आहे, असे भावनिक आवाहन काँग्रेसचे जॉन नाझारेथ यांनी केले आहे. विधानसभा अधिवेशनातही विरोधकांनी या मुद्द्यावर सरकारला चांगलेच धारेवर धरले होते. आता सोमवारची सकाळ चिंबलसाठी दिलासा घेऊन येते की संघर्षाचा नवा अंक सुरू होतो, हे पाहणे महत्त्वाचे ठरेल.
