गाझियाबाद :येथील खोडा भागात बकरीदच्या दिवशी १७ वर्षीय सूर्या चौहान याची हत्या करण्यात आली होती. या प्रकरणातील मुख्य आरोपी असद याला पोलिसांनी चकमकीनंतर पकडले होते. मात्र, चकमकीदरम्यान लागलेल्या गोळीमुळे रुग्णालयात उपचारादरम्यान असदचा मृत्यू झाला असून या कारवाईला पोलिसांचे मोठे यश मानले जात आहे.
मित्राकडून पैसे घेण्यासाठी येणार असल्याची माहिती
या हत्याकांडातील मुख्य आरोपी असद आपल्या एका मित्राकडून पैसे घेण्यासाठी खोडा भागात येणार असल्याची माहिती पोलिसांना रविवारी रात्री उशिरा मिळाली होती. पैसे घेतल्यानंतर शहर सोडून पळून जाण्याचा त्याचा बेत असल्याची माहितीही तपास यंत्रणांना मिळाली होती.
पोलिसांनी रचला सापळा
माहिती मिळताच गाझियाबाद पोलिसांनी परिसरात सापळा रचून वेढा दिला. काही वेळातच असद दुसऱ्या एका व्यक्तीसोबत दुचाकीवरून तेथे पोहोचला. त्यानंतर पोलिसांनी त्याला घेरून पकडण्याचा प्रयत्न केला.
गोळीबारानंतर चकमक
पोलिसांनी असदला थांबण्याचा इशारा केला असता त्याने थांबण्याऐवजी पोलीस कर्मचाऱ्यांवर थेट गोळीबार सुरू केला. त्यानंतर पोलिसांनी आत्मरक्षार्थ प्रत्युत्तरादाखल कारवाई केली. या कारवाईत गोळी लागून असद गंभीर जखमी झाला. त्याला उपचारासाठी रुग्णालयात दाखल करण्यात आले होते, मात्र उपचारादरम्यान त्याचा मृत्यू झाला. या चकमकीत एक पोलीस कॉन्स्टेबलही जखमी झाल्याची माहिती पोलिसांनी दिली.
गाझियाबाद पोलिसांनी घटनास्थळावरून आरोपी वापरत असलेली मोटारसायकल जप्त केली आहे. याशिवाय असदकडून एक गावठी पिस्तूलही जप्त करण्यात आले असून, त्याच शस्त्राचा वापर करून त्याने पोलिसांवर गोळीबार केल्याचा संशय व्यक्त करण्यात आला आहे.