अमेरिकेचे अध्यक्ष ट्रम्प यांचा इशारा : इराणवरील हल्ले तीव्र
अमेरिकेने खर्ग बेटावरील तेल टर्मिनलवर केलेल्या हल्ल्यानंतर उठलेले धुराचे लोट.
न्यूज डेस्क। गोवन वार्ता
वॉशिंग्टन/तेहरान : एका रात्रीत इराणची संपूर्ण संस्कृती नष्ट केली जाईल, अशी धमकी अमेरिकेचे राष्ट्राध्यक्ष डोनाल्ड ट्रम्प यांनी दिली आहे. ते म्हणाले, एका रात्रीत संपूर्ण संस्कृती संपुष्टात येईल, जी पुन्हा कधीही स्थापित केली जाऊ शकणार नाही. असे घडावे अशी माझी इच्छा नाही; पण कदाचित ते घडेलच. तिथे सत्तेत पूर्ण बदल होत आहे. तिथे वेगळी, अधिक बुद्धिमान आणि कमी कट्टर विचारसरणीचे लोक आहेत. कुणास ठाऊक, कदाचित काहीतरी खरोखरच भव्य आणि क्रांतिकारक घडू शकेल.
दरम्यान, अमेरिका आणि इस्रायलने मंगळवारी इराणमधील अनेक ठिकाणी हल्ले केले. सर्वात मोठा हल्ला खर्ग बेटावर झाला. तिथे एका तेल टर्मिनलला लक्ष्य करण्यात आले. कोम आणि काशानमधील पुलांनाही लक्ष्य करण्यात आले. काशानजवळील येह्याबाद रेल्वे पुलावरील हल्ल्यात दोन जण ठार आणि तीन जण जखमी झाले. वायव्य इराणमधील तब्रीझ-झंजन महामार्गावरील एका पुलावरही हल्ला झाला. या हल्ल्यांनंतर इराणने संयुक्त अरब अमिरातीमधील शारजाहवर हल्ला करून प्रत्युत्तर दिले.
परिस्थिती नियंत्रणाबाहेर जाण्याच्या मार्गावर : कतार
मध्यपूर्वेतील परिस्थिती नियंत्रणाबाहेर जाण्याच्या टप्प्यावर पोहोचली आहे, असा इशारा कतारने मंगळवारी दिला. परराष्ट्र मंत्रालयाचे प्रवक्ते माजेद अल-अन्सारी म्हणाले की, परिस्थिती अधिक चिघळण्यापूर्वी संघर्ष सोडवण्यासाठी सर्व पक्षांना आवाहन केले जात आहे. अमेरिकेने दिलेल्या मुदतीपूर्वी तणाव कमी केला जाऊ शकतो का, असे विचारले असता ते म्हणाले की, परिस्थिती नियंत्रणाबाहेर जाण्यापूर्वी तोडगा काढण्याचे प्रयत्न सुरू आहेत. इराणसोबत कोणताही करार सर्व प्रादेशिक देशांच्या संमतीनेच झाला पाहिजे आणि कोणालाही वगळले जाऊ नये.
कतारला या प्रदेशासाठी एक सामायिक सुरक्षा प्रणाली हवी आहे, ज्यामध्ये आंतरराष्ट्रीय हमींचा समावेश असेल आणि जी आंतरराष्ट्रीय कायद्याचे पालन करेल. कतारने स्पष्ट केले की, ते सध्या अमेरिका आणि इराण यांच्यात मध्यस्थ म्हणून काम करत नाहीत. होर्मुझची सामुद्रधुनी कोणत्याही एका देशाच्या नियंत्रणाखाली नाही. तिचा वापर स्वतःच्या फायद्यासाठी केला जाऊ नये.
संयुक्त राष्ट्रात होर्मुझ ठराव पुन्हा बारगळला
होर्मुझच्या सामुद्रधुनीतील जहाजांची सुरक्षा आणि नौकानयनासंबंधीच्या ठरावावर संयुक्त राष्ट्रात (युनो) मंगळवारी मतदान झाले. दोन आठवड्यांत या ठरावात सहा वेळा दुरुस्ती करण्यात आली आहे. रशिया, चीन आणि फ्रान्स यातील काही भागांशी असहमत होते. नवीन मसुद्यानुसार, होर्मुझच्या सामुद्रधुनीतून आपली जहाजे चालवणाऱ्या देशांनी एकत्र काम केले पाहिजे. आवश्यक असल्यास सुरक्षित मार्ग सुनिश्चित करण्यासाठी ते आपल्या जहाजांना सुरक्षा पुरवू शकतात. कोणत्याही देशाने हा सागरी मार्ग बंद करण्याचा किंवा त्यात अडथळा आणण्याचा प्रयत्न करू नये. मात्र हा ठराव मंजूर होऊ शकला नाही. रशिया आणि चीनने या ठरावाला नकार दर्शवला. हा ठराव बहरीनने मांडला होता.
इराणमधील भारतीयांना सुरक्षित ठिकाणी राहण्याचा सल्ला
भारत सरकारने इराणमध्ये राहणाऱ्या आपल्या नागरिकांसाठी नवीन सूचना जारी केली आहे. त्यानुसार, त्यांनी पुढील ४८ तास जिथे आहेत तिथेच राहावे आणि घराबाहेर पडणे टाळावे, असा सल्ला देण्यात आला आहे. भारतीय नागरिकांनी लष्करी तळांवर किंवा संवेदनशील ठिकाणी जाऊ नये. इराणमधील वाढता तणाव आणि संभाव्य हल्ल्यांचा धोका लक्षात घेऊन हे पाऊल उचलण्यात आले आहे. भारत सरकारने यापूर्वीही आपल्या नागरिकांना सावधगिरी बाळगण्याचा आणि गरज भासल्यास इराण सोडण्याचा सल्ला दिला होता.
आपण जगाच्या दीर्घ आणि गुंतागुंतीच्या इतिहासातील सर्वांत महत्त्वाच्या क्षणाचे साक्षीदार होऊ. ४७ वर्षांचा जुलूम, भ्रष्टाचार आणि मृत्यू अखेर संपुष्टात येईल. देव इराणच्या लोकांचे रक्षण करो.
_ डोनाल्ड ट्रम्प, अध्यक्ष, अमेरिका
