नवी दिल्ली : बेबी फूड उत्पादनांसाठी जगप्रसिद्ध असलेली कंपनी नेस्ले सध्या वादात सापडली आहे. भारतात विकल्या जाणाऱ्या नेस्ले सेरेलॅकमध्ये कंपनी ठरवून दिलेल्या प्रमाणापेक्षा जास्त साखरेचा वापर करत असल्याचे नुकतेच एका अहवालातून समोर आले आहे. तर युरोप आणि इतर देशांमध्ये हे प्रमाण नगण्य आहे. ही माहिती एका स्विस स्वयंसेवी संस्थेच्या अहवालातून समोर आली आहे.
अहवालात म्हटले आहे की भारताव्यतिरिक्त आफ्रिका आणि दक्षिण अमेरिकेतील अनेक देशांमध्ये ही प्रकरणे नोंदवली गेली आहेत. अहवालात नेस्लेच्या जवळपास १५० उत्पादनांचे विश्लेषण करण्यात आले आहे. या अहवालात साखरेचे प्रमाण अधिक असल्याने मुलांच्या आरोग्याबाबत चिंता व्यक्त करण्यात आली आहे. जागतिक आरोग्य संघटनेने (WHO) मुलांसाठी बनलेल्या आहारात साखरेचा समावेश न करण्याबाबत सल्ला दिला आहे कारण त्यामुळे बालपणातील लठ्ठपणा आणि इतर आरोग्य समस्यांचा धोका वाढतो.
आरोग्य तज्ज्ञ लहानपणापासून मुलांना गोड पदार्थ खाऊ घालण्यास मनाई करतात. मीठ आणि साखरेचे प्रमाण जास्त असलेला आहार बाळाला देऊ नये. साखरेचे प्रमाण जास्त असलेले अन्न खाल्ल्याने मुलांमध्ये लठ्ठपणा, दात किडणे आणि पोटाशी संबंधित समस्या उद्भवू शकतात.
तपासणीत असे आढळून आले की भारतात विकल्या जाणाऱ्या सेरेलॅकच्या सर्व प्रकारांमध्ये प्रत्येक सर्व्हिंगमध्ये सरासरी ३ ग्रॅम जास्त साखर असते. तर आफ्रिकेतील इथिओपिया आणि आशियातील थायलंड यांसारख्या देशांमध्ये प्रति सर्व्हिंगमध्ये सरासरी ४ ते ६ ग्रॅम साखर आढळून आली आहे. मुलांच्या आरोग्याच्या दृष्टिकोनातून ही बाब चिंताजनक आहे.मात्र, जर्मनी आणि लंडनसारख्या विकसित देशांमध्ये विकल्या जाणाऱ्या उत्पादनांमध्ये साखर आढळली नाही.
नेस्ले कंपनीने स्पष्टीकरण दिले
२०२२ मध्ये भारतीय बाजारपेठेत २५० दशलक्ष डॉलरपेक्षा जास्त विक्रीचे लक्ष्य गाठण्यासाठी नेस्लेने हे केले असल्याचे अहवालात म्हटले आहे. मात्र, या प्रकरणावर स्पष्टीकरण देताना नेस्ले कंपनीने गेल्या काही वर्षांत नेस्लेच्या बेबी फूड उत्पादनांमधील साखरेचे प्रमाण सुमारे ११ टक्क्यांनी कमी केल्याचे सांगितले आहे. कंपनीच्या प्रवक्त्याचे म्हणणे आहे की नेस्लेच्या सर्व उत्पादनांवर एकूण साखरेचे प्रमाण स्पष्टपणे लिहिलेले आहे. काहीवेळा नियामक आवश्यकता, स्थानिक घटक आणि पाककृती यामुळे लहान प्रमाणात वर खाली असू शकते.