पाकिस्तान : पाकिस्तानच्या बलुचिस्तान प्रांतात शनिवारी सकाळी एक अत्यंत भीषण आणि थरारक आत्मघाती हल्ला घडला. पाकिस्तानी सैनिकांना आणि त्यांच्या कुटुंबीयांना घेऊन जाणाऱ्या एका प्रवासी ट्रेनला स्फोटकांनी भरलेल्या कारने जोरदार धडक दिली. या भीषण स्फोटात किमान २४ जणांचा मृत्यू झाला असून ४७ हून अधिक जण गंभीर जखमी झाले आहेत. मृतांमध्ये मोठ्या संख्येने लष्करी जवान आणि त्यांच्या कुटुंबातील सदस्यांचा समावेश आहे. प्रतिबंधित दहशतवादी संघटना 'बलुच लिबरेशन आर्मी'ने या आत्मघाती हल्ल्याची जबाबदारी स्वीकारली आहे.
मिळालेल्या माहितीनुसार, मंगळवारपासून सुरू होणाऱ्या 'ईद'च्या सुट्ट्या साजरी करण्यासाठी हे लष्करी जवान आणि त्यांचे कुटुंबीय रेल्वेने पेशावरकडे निघले होते. क्वेट्टा येथील 'चमन पट्टक' परिसरात रेल्वे गाडी एका सिग्नलवरून जात असताना, अचानक स्फोटकांनी भरलेली एक वेगवान कार रेल्वेच्या एका डब्याला येऊन धडकली. हा स्फोट इतका शक्तिशाली होता की, रेल्वेचे दोन डबे उलटले आणि त्यांना भीषण आग लागली.
स्फोटानंतर घटनास्थळावरून आकाशात काळ्या धुराचे मोठे लोट उसळताना दिसले. स्फोटाच्या तीव्रतेमुळे रेल्वे रुळांपासून २५ ते ३० मीटर अंतरावर उभ्या असलेल्या अनेक कार जळून खाक झाल्या. तसेच जवळील एका बहुमजली इमारतीच्या भिंती कोसळून आणि खिडक्या फुटून मोठे नुकसान झाले आहे. घटनेची माहिती मिळताच लष्कर आणि सुरक्षा दलांनी संपूर्ण परिसराला वेढा घातला. स्थानिक नागरिक आणि बचाव पथकांनी ढिगाऱ्याखालून जखमींना स्ट्रेचरवरून बाहेर काढले.
माहितीनुसार, हा हल्ला अतिशय हाय-सिक्योरिटी झोनमध्ये झाला, जिथे सुरक्षा रक्षक २४ तास तैनात असतात. या हल्ल्यामुळे पाकिस्तान सुरक्षा यंत्रणेच्या लोकशाहीवर मोठे प्रश्नचिन्ह निर्माण झाले आहे. हल्ल्यानंतर प्रसिद्ध केलेल्या अधिकृत निवेदनात बलुच लिबरेशन आर्मीने म्हटले आहे की, आमच्या 'मजीद ब्रिगेड' या आत्मघाती पथकाने क्वेट्टा कॅन्टोन्मेंटमधून शत्रू सैन्याला घेऊन जाणाऱ्या ट्रेनला लक्ष्य केले आहे. या मोहिमेची पूर्ण जबाबदारी आम्ही घेत आहोत.
इराण आणि अफगाणिस्तानच्या सीमेला लागून असलेल्या बलुचिस्तान प्रांतात गेल्या अनेक दशकांपासून फुटीरतावादी चळवळ सुरू आहे. बलुच लिबरेशन आर्मीने यापूर्वीही सुरक्षा दलांवर, नागरिकांवर आणि चीन-पाकिस्तान आर्थिक कॉरिडोअरच्या प्रकल्पांवर अनेक मोठे हल्ले केले आहेत. या ताज्या हल्ल्यामुळे पाकिस्तानमधील अंतर्गत सुरक्षेचा प्रश्न कमालीचा गंभीर बनला आहे.
