पणजी : गोवा शिपयार्ड लिमिटेडने (जीएसएल) (Goa Shipyard Limited (GSL) ) आयसीजीएस (ICGS) ‘अमूल्य’ गस्ती जहाज भारतीय तटरक्षक दलाकडे (Indian Coast Guard) सुपूर्द केले. आत्मनिर्भर भारत उपक्रमांतर्गत भारतीय तटरक्षक दलासाठी बांधल्या जाणाऱ्या आठ जलद गस्ती जहाजांच्या (एफपीव्ही) मालिकेतील हे जहाज तिसरे आहे.
औपचारिक हस्तांतरण समारंभाला गोवा शिपयार्डचे अध्यक्ष आणि व्यवस्थापकीय संचालक ब्रजेश कुमार उपाध्याय, संचालक (ऑपरेशन्स) आरएडीएम नेल्सन डिसोझा (निवृत्त), संचालक (वित्त) जहांगीर आलम अन्सारी, डीआयजी व्ही. के. परमार आणि आयसीजीएस अमूल्यचे कमांडिंग ऑफिसर कमांडर (जेजी) अनुपम सिंग यांच्या उपस्थितीत पार पडला.
५१.४३ मीटर वजनाचे हे जहाज ८ मीटर रुंदीचे आणि २.५ मीटरच्या ड्रॉटवर ३३० टन विस्थापनासह डिझाइन केलेले आहे. हे जहाज दुहेरी मरीन डिझेल इंजिनांनी सूसज्ज आहे. ज्यामध्ये नियंत्रणीय पिच प्रोपेलर आहेत. एफपीव्ही (FPV) वर्गातील पहिले जहाज जे उच्च कार्यक्षमता प्रदान करते. हे जहाज २७ नॉट्सपेक्षा जास्त वेग मिळवू शकते.
त्याची सहनशक्ती १,५०० नॉटिकल मैल आहे. दीर्घकाळाच्या ऑपरेशन्सना समर्थन देण्यासाठी ते एकात्मिक यंत्रसामग्री नियंत्रण प्रणालीने देखील सूसज्ज आहे. या जहाजाची सहा अधिकारी आणि ३५ क्रू खलाशी बसण्याची क्षमता आहे. मत्स्यव्यवसाय संरक्षण, विशेष आर्थिक क्षेत्र देखरेख, किनारी गस्त, तस्करी विरोधी, चाचेगिरी विरोधी आणि शोध आणि बचाव कार्यांसाठी बांधलेले, आयसीजीएस ‘अमूल्य’ (ICGS) किनारी आणि किनाऱ्यावरील सुरक्षा वाढवेल अशी अपेक्षा आहे.
