२२ डिसेंबर रोजी निकाल : आचारसंहिता लागू
पणजी : जिल्हा पंचायत (Zilla Panchayat) (ZP) निवडणुकीचे (Election) वेळापत्रक शनिवारी जाहीर करण्यात आले. २० डिसेंबर रोजी राज्यातील ५० जिल्हा पंचायत मतदारसंघांसाठी निवडणूक होणार आहे. १ ते ९ डिसेंबरपर्यंत अर्ज सादर करता येतील.
अर्ज मागे घेण्याची तारीख ११ डिसेंबर असेल आणि त्याच दिवशी दुपारी उमेदवारांची यादी जाहीर केली जाईल. २२ डिसेंबर रोजी निकाल जाहीर केला जाणार. पंचायत क्षेत्रात निवडणूक आचारसंहिता (Code of conduct) लागू झाली आहे, असे राज्य निवडणूक आयुक्त मिनिन डिसोझा यांनी सांगितले.
राज्य निवडणूक आयुक्त मिनिन डिसोझा यांनी पणजीतील आल्तीन येथे घेतलेल्या पत्रकार परिषदेत निवडणुकीचे वेळापत्रक जाहीर केले. निवडणुकीसाठी १ डिसेंबर ते ९ डिसेंबर २०२५ पर्यंत सकाळी १० ते दुपारी १ वाजेपर्यंत उमेदवारी अर्ज भरता येणार आहेत. अर्ज दाखल करण्याचा कालावधी सात दिवसांचा असेल. ३ डिसेंबर रोजी सार्वजनिक सुट्टी आणि ७ डिसेंबर रोजी रविवार असल्याने, त्यादिवशी अर्ज दाखल करता येणार नसल्याचे डिसोझा म्हणाले.
१० डिसेंबर रोजी सकाळी १० ते दुपारी ३ या वेळेत उमेदवारी अर्जांची छाननी केली जाईल. उमेदवारांना ११ डिसेंबर रोजी सकाळी १० ते दुपारी २ या वेळेत अर्ज मागे घेता येतील. त्याच दिवशी दुपारी २ वाजल्यानंतर उमेदवारांची अंतिम यादी जाहीर केली जाईल. जिल्हा पंचायत निवडणूक २० डिसेंबर रोजी सकाळी ८ ते सायंकाळी ५ या वेळेत होईल आणि निकाल २२ डिसेंबर रोजी सकाळी ८ वाजता जाहीर केले जातील, असे डिसोझा म्हणाले.
आजपासून गोव्यात जिल्हा पंचायत क्षेत्रात निवडणुकीची आचारसंहिता लागू झाली आहे. तथापि, पणजी महानगरपालिका क्षेत्र व नगरपालिका क्षेत्रात आचारसंहिता लागू नसल्याचे डिसोझा म्हणाले. आचारसंहितेच्या कडक अंमलबजावणीवर लक्ष ठेवण्यासाठी आयोगाने एक फिरते पथक आणि एक देखरेख पथक तैनात केले आहे.
निवडणूक प्रक्रिया सुरळीत आणि शांततेत पार पडावी यासाठी पोलिस विभागाने अतिरिक्त पोलिस बळ तैनात केले आहे. उमेदवारांना जास्तीत जास्त ५ लाख रुपयांपर्यंत खर्च करण्याची मुभा आहे. मतदान मतपत्रिकेद्वारे केले जाईल, असे डिसोझा म्हणाले.
