तिघेजण पोलीस कोठडीत : दोघांना जामीन
मडगाव : मुंगूल येथील गँगवॉरप्रकरणी फातोर्डा पोलिसांनी अटक केलेल्या २३ संशयिताच्या न्यायालयीन कोठडीत १२ दिवसांची वाढ करण्यात आली. संशयित अमोघ नाईक, व्हॅली डिकोस्टा व प्रकाश करबार हे पोलीस कोठडीत असून दोघा संशयितांना आतापर्यंत जामीन मिळालेला आहे.
मुुंगूल येथील शगुन हॉटेलनजीक १२ ऑगस्ट रोजी गाडी अडवून तलवार, कोयता, सोडा बॉटल्सचा वापर करत संशयितांनी गोळीबारही केला होता. गुन्हेगारी जगतातील वर्चस्वासाठी हा हल्ला झालेला होता व या गँगवॉरमध्ये संशयित वॉल्टर गँगचे रफीक ताशान (२४) व युवकेश सिंग बदैला (२०) हे गंभीर जखमी झाले होते.
याप्रकरणी पोलिसांनी राजस्थान येथे पथक पाठवून बिश्नोई गँगशी संबंध असलेल्या आणि बंदूक पुरवल्याचा संशय असलेल्या ओमसा याला अटक करण्यात आली आहे. शरण आलेल्या संशयित अमोघ नाईक, व्हॅली डिकोस्टा व प्रकाश करबार यांनाही अटक करण्यात आली असून, त्यांना चार दिवसांची पोलीस कोठडी मिळाली आहे. दरम्यान, संशयित दीपक कट्टिमणी व परशुराम राठोड यांना सशर्त जामीन मिळाला आहे.
पोलिसांची मोठी कारवाई; २८ जणांना अटक
दक्षिण गोवा पोलीस अधीक्षक टिकमसिंग वर्मा यांच्या नेतृत्वाखाली फातोर्डा पोलिसांनी या प्रकरणी आतापर्यंत २८ जणांना अटक केली आहे. यात विल्सन कार्व्हालो, शाहरुख शेख, रसूल शेख, मोहम्मद अली, वासू कुमार, सूरज माझी, मलिक शेख, गौरांग कोरगावकर, सुनील बिलावर, जॉयस्टन फर्नांडिस, इम्रान बेपारी, अक्षय तलवार, अविनाश गुंजीकर, अमर कुलाल, ताहीर, सलीम, महेंद्र नाईक आणि लुकआऊट नोटीस जारी केलेला राहुल तलवार, अमोघ नाईक याचा सहकारी मंदार प्रभू गावकर व सूरज नाईक बोरकर, राजेश हेलमा यांचा समावेश आहे.
