विद्यार्थ्यांमध्ये ‘स्टेम लॅब’ आधुनिक तंत्र विकसित करणार

मुख्यमंत्री डॉ. सावंत : विद्यार्थ्यांना विविध तंत्रज्ञानाची माहिती सहज मिळणार

Story: वार्ताहर। गोवन वार्ता |
19th July, 11:50 pm
विद्यार्थ्यांमध्ये ‘स्टेम लॅब’ आधुनिक तंत्र विकसित करणार

साखळी : गोव्यातील शैक्षणिक क्षेत्रात नाविन्यपूर्ण बदल घडत असताना प्राथमिक स्तरापासून विद्यार्थ्यांना आधुनिक तंत्राचा वापर करण्यासाठी वेगवेगळे उपक्रम राबविण्यात येत आहेत. त्या अंतर्गत स्टेम लॅब व इतर माध्यमातून आधुनिक तंत्र मुलांना विकसित करण्याची संधी मिळावी हा आमचा संकल्प आहे. या अंतर्गत नव्या शैक्षणिक धोरणात अनेक सुविधा प्राथमिक स्तरापासून उपलब्ध करण्याचा सरकारचा उद्देश असून स्टेम लॅबच्या माध्यमातून विद्यार्थ्यांना वेगवेगळ्या उपक्रमांची माहिती सहज मिळणे शक्य होणार असल्याचे मुख्यमंत्री डॉ. प्रमोद सावंत यांनी साखळी येथे सांगितले.
मुख्यमंत्री डॉ. सावंत यांनी सरकारी उच्च माध्यमिक विद्यालय, साखळी येथे स्टेम लॅबचे उदघाटन केले. यावेळी जलसंपदा मंत्री सुभाष शिरोडकर व इतर मान्यवर उपस्थित होते. प्राथमिक स्तरावर विद्यार्थ्यांना विज्ञानाची रोबोटिक्स व इतर तंत्रज्ञानाची माहिती उपलब्ध व्हावी व त्याच्या माध्यमातून विकसित भारत २०४७ साकारण्यासाठी विद्यार्थ्यांची गुणवत्ता सार्थकी लागावी, हा उद्देश आहे. डिजिटल कौशल्य आत्मसात करण्यासाठी स्टेम लॅब महत्त्वपूर्ण माध्यम ठरणार असून त्याचा उपयोग सर्वांनी करावा, असे आवाहन यावेळी मुख्यमंत्र्यांनी केले.
यावेळी सुभाष शिरोडकर यांनी मार्गदर्शन केले. साखळी शिरोडा व आसपासच्या भागातील विद्यार्थ्यांना यावेळी मार्गदर्शन करण्यात आले.

शैक्षणिक क्षेत्रात क्रांती घडवण्यासाठी राज्य सरकार वेगवेगळे प्रयोग करीत असून कौशल्य विकसित करताना आधुनिक तंत्रज्ञानाचा वापर बालमनावर रुजवण्यासाठी सरकारने विविध योजना आखल्या आहेत. - डॉ. प्रमोद सावंत, मुख्यमंत्री