मुंबई : सय्यद मुश्ताक अली ट्रॉफी २०२४ च्या ग्रुप ई मध्ये मुंबईचा सामना गोव्याशी झाला. या सामन्यात मुंबईने कर्णधार श्रेयस अय्यरच्या शतकी खेळीच्या जोरावर २६ धावांनी विजय मिळवला. पण गोव्यानेही प्रभावित करत मुंबईला चांगली लढत दिली. गोवा संघाचा वेगवान गोलंदाज अर्जुन तेंडुलकर या सामन्यात कुचकामी ठरला.
या सामन्यात गोव्याने मुंबईविरुद्ध नाणेफेक जिंकून प्रथम गोलंदाजी करण्याचा निर्णय घेतला. प्रथम खेळताना मुंबईने २० षटकांत ४ गडी गमावून २५० धावा केल्या. गोव्यासमोर विजयासाठी २५१ धावांचे मोठे लक्ष्य होते, परंतु या संघाने २० षटकांत ८ गडी गमावून २२४ धावा केल्या.मुंबईचा कर्णधार श्रेयस अय्यरने गोव्याविरुद्ध धडाकेबाज फलंदाजी केली आणि आयपीएल लिलावाच्या एक दिवस आधी एक अप्रतिम खेळी खेळली, त्याने ५७ चेंडूत १० षटकार आणि ११ चौकारांच्या मदतीने नाबाद १३० धावा केल्या. मुंबईसाठी सलामी देताना पृथ्वी शॉने २२ चेंडूत १ षटकार आणि ५ चौकारांच्या मदतीने ३३ धावा केल्या. शशम मुलानीने आपल्या संघासाठी ४१ धावांची महत्त्वपूर्ण खेळी केली. या सामन्यात गोव्याकडून दर्शन मिसाळने सर्वाधिक २ बळी घेतले. परंतु अर्जुन तेंडुलकर प्रभावी ठरला नाही आणि त्याने ४ षटकात १२ च्या सरासरीने ४८ धावा दिल्या आणि त्याला कोणतेही यश मिळाले नाही.
गोवा संघानेही मुंबईच्या चमकदार गोलंदाजीसमोर चांगली फलंदाजी केली आणि संघाची धावसंख्या २२४ धावांपर्यंत पोहोचली, जी खूपच प्रभावी होती. गोव्यासाठी सुयश प्रभुदेसाईने ३६ चेंडूत ९ चौकारांच्या मदतीने ५२ धावा केल्या तर विकास सिंगने ४७ धावांची खेळी केली. सलामीवीर इशान गडेकरने १६ चेंडूत ४० धावा केल्या तर अर्जुन तेंडुलकरने ४ चेंडूत ९ धावा केल्या. मुंबईकडून रॉयस्टन डायस आणि सूर्यांश शेडगे यांनी प्रत्येकी २ बळी घेतले. या सामन्यात शार्दुल ठाकूरला एक यश मिळाले.
