दुसऱ्या कसोटी सामन्यात न्यूझीलंडचा ३७२ धावांनी पराभव : रविचंद्रन अश्विन मालिकावीर
मुंबई : दुसऱ्या व अंतिम कसोटीत भारताने न्यूझीलंडचा ३७२ धावांनी मोठा पराभव केला आहे. यासह टीम इंडियाने २ कसोटी सामन्यांची मालिका १-० ने जिंकली. मुंबई कसोटी जिंकण्यासाठी भारताने न्यूझीलंडसमोर ५४० धावांचे लक्ष्य ठेवले होते, त्यामुळे न्यूझीलंडला विजय मिळवता आला नाही आणि १६७ धावा करून सर्वबाद झाला. या विजयामुळे भारत आयसीसी क्रमवारीत पहिल्या स्थानावर पोहोचला आहे.
या दणदणीत पराभवामुळे न्यूझीलंडची भारतात मालिका जिंकण्याची प्रतीक्षाही वाढली आहे. त्याचवेळी, गेल्या ३३ वर्षात भारतात कसोटी सामना जिंकण्याचे त्याचे स्वप्नही भंगले. ही कसोटी मालिका जागतिक कसोटी चॅम्पियनशिपचा भाग होती. कसोटी चॅम्पियनशिपच्या दुसऱ्या आवृत्तीतील ही भारताची पहिली मायदेशातील मालिका होती. या आवृत्तीची सुरुवात त्यांनी इंग्लंड दौऱ्याने केली.
१९५६ पासून न्यूझीलंडचा हा १२ वा भारत दौरा होता. या दौऱ्यासह, त्यांना भारतात ३७ कसोटी सामने खेळले, ज्यामध्ये किवी संघ केवळ दोन कसोटी जिंकू शकला आहे, तर १५ कसोटी सामने गमावल्या आहेत. यावरून त्यांचा भारतातील रेकॉर्ड किती वाईट आहे हे स्पष्ट होते. न्यूझीलंडने १९८८ मध्ये टीम इंडियाचा शेवटचा पराभव केला होता. न्यूझीलंडने भारतात कधीही कसोटी मालिका जिंकलेली नाही. गेल्या ६५ वर्षांपासूनची ही प्रतीक्षा यावेळीही कायम आहे.
भारताने पहिल्या डावात ३२५ धावा केल्या होत्या. प्रत्युत्तरात न्यूझीलंडचा संघ पहिल्या डावात ६२ धावांवर गारद झाला होता. यानंतर भारताने आपला दुसरा डाव ७ बाद २७६ धावांवर घोषित केला आणि न्यूझीलंडसमोर विजयासाठी ५४० धावांचे लक्ष्य ठेवले. पण वानखेडेच्या खेळपट्टीवर न्यूझीलंडचा दुसरा डावही निराशाजनक ठरला. तिसऱ्या दिवसाचा खेळ संपेपर्यंत न्यूझीलंडने ५ गडी गमावून १४० धावा केल्या होत्या.
चौथ्या दिवशी न्यूझीलंडने या धावसंख्येच्या पुढे खेळण्यास सुरुवात केली. मात्र अवघ्या ४५ मिनिटांत उर्वरित ५ फलंदाजही पॅव्हेलियनमध्ये परतले आणि सामना भारताच्या झोळीत पडला. अशाप्रकारे टीम इंडियाने केवळ या सामन्यावरच कब्जा केला नाही तर मालिकेवरही कब्जा केला. धावांच्या बाबतीत भारताचा हा सर्वात मोठा विजय आहे. यापूर्वी त्यांनी दक्षिण आफ्रिकेचा ३३७ धावांनी पराभव केला होता.
