शिक्षण खात्याकडून परिपत्रक जारी
प्रतिनिधी । गोवन वार्ता
पणजी : नव्या राष्ट्रीय शिक्षण धोरणानुसार आता ३ वर्षे पूर्ण झालेल्या मुलांना नर्सरीच्या प्रथम वर्षासाठी प्रवेश दिला जाणार आहे. या विषयीचे परिपत्रक शिक्षण खात्याने जारी केले आहे.
ज्या मुलांना ३१ मेपर्यंत ३ वर्षे पूर्ण झाली आहेत, त्यांना २०२१-२०२२ या शैक्षणिक वर्षात नर्सरीत प्रवेश द्यावा, असे शिक्षण खात्याने नर्सरीचे वर्ग असलेल्या संस्थांच्या मुख्याध्यापकांना कळवले आहे. नव्या शिक्षण धोरणात प्राथमिक शिक्षणापूर्वी फाउंडेशन कोर्स आहे. त्यात केजी १ आणि केजी २ या दोन इयत्तांचा समावेश आहे. फाउंडेशन कोर्स पूर्ण झाल्यानंतर मुलाला इयत्ता पहिलीत प्रवेश मिळेल. यापूर्वी ३ वर्षे झाल्यानंतर मुले अंगणवाडी किंवा केजीत जात होती. नव्या शिक्षण धोरणात अंगणवाडीच्या शिक्षणाला फाउंडेशन कोर्स म्हटले आहे. या बदलाची या वर्षापासून अंमलबजावणी होईल, असे संकेत या परिपत्रकातून मिळत आहेत.
२०२१-२२ या शैक्षणिक वर्षात नर्सरी वर्गापासून नव्या शिक्षण धोरणाची कार्यवाही होईल, असे मुख्यमंत्री डॉ. प्रमोद सावंत यांनी आधीच जाहीर केले होते. त्याप्रमाणे नव्या शिक्षण धोरणानुसार नर्सरी प्रवेशाचे परिपत्रक जारी झाले आहे.
